హైదరాబాద్ నగరానికి ఊపిరితిత్తుల్లాంటి కేబీఆర్ పార్క్ పరిసరాల్లో చెట్ల నరికివేతపై తీవ్ర ఆందోళనలు వ్యక్తమవుతున్నాయి. అభివృద్ధి పేరుతో వందల సంవత్సరాల నాటి చెట్లను తొలగించడం పర్యావరణానికి ప్రమాదకరమని పర్యావరణ ప్రేమికులు, రాజకీయ నాయకులు, యువత తీవ్రంగా ప్రశ్నిస్తున్నారు. “అండమాన్ నికోబార్ దీవుల్లో ఒక లెక్క.. హైదరాబాద్లో మరో లెక్కనా?” అంటూ రాష్ట్ర ప్రభుత్వ వైఖరిపై విమర్శలు వెల్లువెత్తుతున్నాయి.
హైదరాబాద్లో ఇప్పటికే పెరుగుతున్న కాలుష్యం, ఉష్ణోగ్రతల మధ్య కేబీఆర్ పార్క్ నగరానికి ప్రధాన గ్రీన్ స్పేస్గా ఉందని ఉద్యమకారులు చెబుతున్నారు. అలాంటి ప్రాంతంలో భారీ స్థాయిలో చెట్ల తొలగింపు జరగడం వల్ల పక్షులు, జంతువులు తమ నివాసాలను కోల్పోతాయని ఆందోళన వ్యక్తం చేస్తున్నారు. “పక్షులు ఎక్కడికి వెళ్లాలి? జంతువులు ఎలా జీవించాలి?” అని ప్రశ్నిస్తున్నారు.
ఫ్లైఓవర్లు, రోడ్ల విస్తరణ, డెవలప్మెంట్ పేరుతో ప్రకృతిని నాశనం చేయడం సరైంది కాదని విమర్శిస్తున్నారు. చెట్ల నరికివేత కారణంగా బంజారాహిల్స్, జూబ్లీహిల్స్ ప్రాంతాల్లో ఉష్ణోగ్రతలు మరో 2 నుంచి 5 డిగ్రీల వరకు పెరిగే ప్రమాదం ఉందని పర్యావరణ వేత్తలు హెచ్చరిస్తున్నారు.
మాజీ రాజ్యసభ సభ్యుడు J. Santosh Kumar చేపట్టిన గ్రీన్ ఇండియా చాలెంజ్ను గుర్తు చేస్తూ, “మొక్కలు నాటడం భవిష్యత్ తరాలకు ఇచ్చే గొప్ప ఆస్తి” అని పలువురు పేర్కొంటున్నారు. మంచి వాతావరణం, స్వచ్ఛమైన ఆక్సిజన్ కోసం పచ్చదనం అవసరమని చెబుతున్నారు.
అదే సమయంలో కాంగ్రెస్ అగ్రనేత Rahul Gandhi గతంలో గ్రీన్ స్పేస్లు, పర్యావరణ పరిరక్షణపై మాట్లాడిన విషయాన్ని గుర్తు చేస్తూ, ఇప్పుడు హైదరాబాద్లో జరుగుతున్న చెట్ల నరికివేతపై ప్రభుత్వం ఎందుకు స్పందించడం లేదని ప్రశ్నిస్తున్నారు.
పర్యావరణ కార్యకర్తల ఆరోపణల ప్రకారం, సరైన అనుమతులు లేకుండా చెట్ల తొలగింపు జరుగుతోందని, కోర్టు స్టేలు ఉన్నప్పటికీ పనులు కొనసాగుతున్నాయని అంటున్నారు. దీనివల్ల పక్షులు, జంతు జాతులు తీవ్ర ఇబ్బందులు ఎదుర్కొంటున్నాయని ఆవేదన వ్యక్తం చేస్తున్నారు.
“డెవలప్మెంట్ కావాలి.. కానీ ప్రకృతిని నాశనం చేసి కాదు” అని ఉద్యమకారులు స్పష్టం చేస్తున్నారు. హైదరాబాద్ భవిష్యత్తును కాపాడాలంటే నగరంలోని గ్రీన్ స్పేస్లను రక్షించాల్సిందేనని చెబుతున్నారు.
ఇక యువత, విద్యార్థులు కూడా పర్యావరణ పరిరక్షణ కోసం ముందుకు రావాలని పిలుపునిస్తున్నారు. “సేవ్ కేబీఆర్ పార్క్” ఉద్యమాన్ని బలోపేతం చేసి హైదరాబాద్ పచ్చదనాన్ని కాపాడాలని కోరుతున్నారు.
