బండి సంజయ్ కుమారుడు బండి భగీరథ్పై నమోదైన పోక్సో కేసు ప్రస్తుతం తెలంగాణ రాజకీయాల్లో తీవ్ర చర్చనీయాంశంగా మారింది. కేసు దర్యాప్తు కొనసాగుతున్న సమయంలో ప్రజల్లోనూ పెద్ద ఎత్తున చర్చ జరుగుతోంది. ముఖ్యంగా సోషల్ మీడియా, యూట్యూబ్ చర్చలు, ఫోన్ కాల్స్, ప్రజాభిప్రాయాల్లో ఈ వ్యవహారంపై భిన్నాభిప్రాయాలు వ్యక్తమవుతున్నాయి.
ఇటీవల వైరల్ అవుతున్న ఓ వీడియోలో కొందరు యువకులు మాట్లాడుతూ “ఆయన దేశ హోంమినిస్టర్ కొడుకు అయినా సరే చట్టం ముందు అందరూ సమానమే” అంటూ వ్యాఖ్యానించారు. “ఒక అమ్మాయిని ఇబ్బంది పెట్టి, తిరిగి ఆమెపైనే కేసులు పెట్టే పరిస్థితి వస్తే ప్రజలు ప్రశ్నిస్తారు” అంటూ ఆగ్రహం వ్యక్తం చేశారు.
“డబ్బు, అధికారం ఉందని ఎవరైనా తప్పించుకుంటారనే భావన ప్రజల్లో ఉండకూడదు. ఒక అమ్మాయికి అన్యాయం జరిగితే న్యాయం జరగాల్సిందే” అని పలువురు పేర్కొన్నారు. “పవర్ ఉందని కేసులు మేనేజ్ చేస్తారని ప్రజలు అనుకుంటున్నారు. కానీ చట్టం తన పని చేయాలి” అంటూ కొందరు యువకులు స్పందించారు.
అయితే మరోవైపు ఈ కేసుపై రాజకీయ కోణంలో ప్రచారం జరుగుతోందని బీజేపీ నేతలు ఆరోపిస్తున్నారు. పూర్తి స్థాయి దర్యాప్తు పూర్తికాకముందే మీడియా ట్రయల్ నిర్వహించడం సరైంది కాదని వారు చెబుతున్నారు. “ఎవరైనా తప్పు చేస్తే శిక్ష తప్పదు. కానీ దర్యాప్తు పూర్తయ్యే వరకు వేచి చూడాలి” అని బీజేపీ వర్గాలు పేర్కొంటున్నాయి.
ఇప్పటికే ఈ కేసులో పోలీసులు దర్యాప్తును వేగవంతం చేశారు. కాల్ డేటా, డిజిటల్ ఆధారాలు, బాధితురాలి వాంగ్మూలం తదితర అంశాలపై అధికారులు దృష్టి పెట్టారు. కేసు పర్యవేక్షణ కోసం మహిళా ఐపీఎస్ అధికారిని కూడా నియమించారు.
ఈ వ్యవహారం రాజకీయ వర్గాల్లోనూ వేడెక్కింది. అధికార కాంగ్రెస్ పార్టీ నేతలు బీజేపీపై విమర్శలు గుప్పిస్తుండగా, బీజేపీ నేతలు మాత్రం “దర్యాప్తు జరిగి నిజాలు బయటకు రావాలి” అనే వైఖరిలో ఉన్నారు.
సోషల్ మీడియాలో మాత్రం “సాధారణ వ్యక్తి అయితే ఇప్పటికి అరెస్ట్ అయ్యేవాడు”, “పవర్ ఉన్న వాళ్లకు చట్టం వేరేలా పనిచేస్తుందా?” వంటి ప్రశ్నలు పెద్ద ఎత్తున వినిపిస్తున్నాయి. మరోవైపు “న్యాయం జరిగితే చాలు, రాజకీయ లాభనష్టాల కోసం ఈ అంశాన్ని వాడుకోవద్దు” అనే అభిప్రాయాలు కూడా వ్యక్తమవుతున్నాయి.
ప్రస్తుతం ప్రజల దృష్టి మొత్తం పోలీసుల దర్యాప్తుపైనే ఉంది. ఈ కేసులో నిజానిజాలు ఏమిటి? ఆరోపణలు ఎంతవరకు నిజం? అనే విషయాలు దర్యాప్తు పూర్తయ్యాకే స్పష్టత వచ్చే అవకాశం ఉంది.
