హైదరాబాద్ నగర భవిష్యత్తును దృష్టిలో పెట్టుకొని హైడ్రా సంస్థ వచ్చే పదేళ్లకు భారీ బ్లూప్రింట్ సిద్ధం చేస్తోందని హైడ్రా కమిషనర్ Ranganath వెల్లడించారు. వేటు న్యూస్ కాంక్లేవ్ 2026లో “హైడ్రా బ్లూప్రింట్ ఫర్ ది నెక్స్ట్ డికేడ్” అంశంపై మాట్లాడిన ఆయన, నగరంలో పెరుగుతున్న జనాభా, భూములపై ఒత్తిడి, చెరువుల ఆక్రమణలు, వాతావరణ మార్పులు వంటి సవాళ్లను ఎదుర్కొనేందుకు హైడ్రా కీలకంగా పనిచేస్తోందన్నారు.
హైదరాబాద్ డిజాస్టర్ రెస్పాన్స్ అండ్ అసెట్ ప్రొటెక్షన్ ఏజెన్సీగా హైడ్రా రెండు ప్రధాన లక్ష్యాలతో పనిచేస్తోందని ఆయన వివరించారు. ఒకటి విపత్తుల నివారణ, రెండోది ప్రజా ఆస్తుల పరిరక్షణ. చెరువులు, నాలాలు, పార్కులు, రోడ్లు ఆక్రమణలకు గురికాకుండా కాపాడితేనే నగరంలో వరదల ముప్పును తగ్గించవచ్చని తెలిపారు.
1975 నుంచి 2025 వరకు హైదరాబాద్ జనాభా దాదాపు 6.2 రెట్లు పెరిగిందని, 2050 నాటికి ఇది మరింతగా రెట్టింపు అయ్యే అవకాశం ఉందన్నారు. భూముల ధరలు కూడా 100 నుంచి 500 రెట్లు పెరగడంతో చెరువులు, కుంటలు, నాలాలపై తీవ్ర ఒత్తిడి ఏర్పడిందని చెప్పారు. ప్రస్తుతం హైదరాబాద్ పరిధిలో 61 శాతం చెరువులు ఆక్రమణలకు గురయ్యాయని, హైడ్రా లాంటి వ్యవస్థ లేకపోతే ఇది 80 శాతానికి చేరుకునేదని హెచ్చరించారు.
కాంక్రీటైజేషన్ పెరగడం వల్ల భూగర్భ జలాలు తగ్గిపోతున్నాయని, వర్షపు నీరు నేలలోకి ఇంకకుండా నేరుగా వరదల రూపంలో మారుతోందని ఆయన వివరించారు. గతంలో 100 లీటర్ల వర్షంలో 40 లీటర్లు భూమిలోకి ఇంకేవని, ఇప్పుడు కేవలం 2 లీటర్లు మాత్రమే ఇంకుతున్నాయని తెలిపారు. ఇదే నగర వరదలకు, వాతావరణ మార్పులకు ప్రధాన కారణమన్నారు.
హైడ్రా ఏర్పాటుతో చెరువుల హద్దులను కచ్చితంగా గుర్తించి అమలు చేసే వ్యవస్థ అందుబాటులోకి వచ్చిందని చెప్పారు. గతంలో ఇరిగేషన్, రెవెన్యూ, మున్సిపల్ శాఖల మధ్య సమన్వయం లేక ఆక్రమణలపై చర్యలు ఆలస్యమయ్యేవని, ఇప్పుడు అన్ని అధికారాలు ఒకే సంస్థకు రావడంతో వేగంగా చర్యలు తీసుకునే పరిస్థితి ఏర్పడిందన్నారు.
సికింద్రాబాద్ పాట్నీ నాలా వద్ద 30 ఏళ్లుగా కొనసాగుతున్న ఆక్రమణలను తొలగించిన ఘటనను ఆయన ఉదాహరణగా ప్రస్తావించారు. 20 మీటర్ల వెడల్పు ఉండాల్సిన నాలా కేవలం 5 మీటర్లకు కుదించడంతో 27 కాలనీలు వరద ముప్పును ఎదుర్కొన్నాయని తెలిపారు. హైడ్రా జోక్యంతో 24 గంటల్లోనే ఆక్రమణలను తొలగించి నాలా విస్తరణ చేపట్టామని వెల్లడించారు.
బతుకమ్మకుంట వంటి వివాదాస్పద ప్రాంతాల్లో కూడా శాటిలైట్ డేటా, సర్వే ఆఫ్ ఇండియా మ్యాప్స్, నాసా ల్యాండ్సాట్ చిత్రాల ఆధారంగా చెరువుల అసలు హద్దులను గుర్తిస్తున్నామని చెప్పారు. కోర్టు కేసులు ఎదురైనా చట్టపరంగా ముందుకు సాగుతున్నామని పేర్కొన్నారు.
హైదరాబాద్ పరిధిలో మొత్తం 1360 చెరువులు ఉన్నాయని, అందులో కేవలం 700 చెరువులే అధికారిక రికార్డుల్లో ఉన్నాయని వెల్లడించారు. మిగిలిన చెరువులను కూడా గుర్తించి రికార్డుల్లోకి తీసుకురావడమే లక్ష్యమన్నారు. వచ్చే 10 ఏళ్లలో చెరువులను పునరుద్ధరించి, వాటి చుట్టూ పార్కులు, వాకింగ్ ట్రాక్స్, పిల్లల ఆట స్థలాలు ఏర్పాటు చేసి ప్రజలకు అందుబాటులోకి తీసుకురావాలని ప్రణాళిక రూపొందిస్తున్నామని చెప్పారు.
హైడ్రా చర్యలతో నగరంలో భూగర్భ జలాల స్థాయి పెరుగుతోందని కూడా ఆయన తెలిపారు. కొన్ని ప్రాంతాల్లో ట్యాంకర్లపై ఆధారపడే పరిస్థితి తగ్గిందని ప్రజలు స్వయంగా చెబుతున్నారని పేర్కొన్నారు. చెరువుల పరిరక్షణ ద్వారా పర్యావరణ సమతౌల్యం, నీటి భద్రత, ప్రజల జీవన ప్రమాణాలు మెరుగుపడతాయని రంగనాథ్ స్పష్టం చేశారు.
