హైదరాబాద్లో చెరువులు, నాలాలు, ప్రభుత్వ భూముల పరిరక్షణ కోసం ఏర్పాటు చేసిన హైడ్రా సంస్థ ఇప్పుడు రాష్ట్రవ్యాప్తంగా చర్చనీయాంశంగా మారింది. అక్రమ ఆక్రమణలపై కఠిన చర్యలు తీసుకుంటూ ముందుకు సాగుతున్న హైడ్రా, నగర భవిష్యత్తును దృష్టిలో పెట్టుకొని దీర్ఘకాలిక ప్రణాళికతో పని చేస్తోందని అధికారులు చెబుతున్నారు.
సికింద్రాబాద్ ఆనంద్ థియేటర్ సమీపంలోని నాలా ఆక్రమణలను తొలగించిన ఘటనను అధికారులు ఉదాహరణగా చెబుతున్నారు. దాదాపు 30 ఏళ్లుగా కొనసాగుతున్న ఆక్రమణల కారణంగా నాలా వెడల్పు భారీగా తగ్గిపోయి, వర్షాకాలంలో 27 కాలనీలు ముంపుకు గురవుతున్నాయని పేర్కొన్నారు. లక్షన్నర మందికి పైగా ప్రజలు ఇబ్బందులు పడుతున్న పరిస్థితిలో హైడ్రా రంగంలోకి దిగిందని తెలిపారు. కేవలం 24 గంటల్లోనే అక్రమ నిర్మాణాలను తొలగించి నాలా విస్తరణ చేపట్టినట్లు వెల్లడించారు.
హైడ్రా చర్యలతో రియల్ ఎస్టేట్ రంగంలో కూడా ప్రభావం కనిపించిందని, అయితే మార్పు వచ్చినప్పుడు ప్రతిఘటన సహజమని అధికారులు అభిప్రాయపడ్డారు. బతుకమ్మకుంట వంటి ప్రాంతాల్లో కోర్టు కేసులు ఎదురవుతున్నప్పటికీ, పాత సర్వే ఆఫ్ ఇండియా మ్యాప్స్, శాటిలైట్ చిత్రాలు, ఇరిగేషన్ శాఖ గెజిట్ రికార్డులు చెరువుల ఉనికిని స్పష్టంగా చూపిస్తున్నాయని వివరించారు.
హైదరాబాద్ పరిధిలో ఔటర్ రింగ్ రోడ్ వరకు మొత్తం 1360 చెరువులు ఉన్నాయని, అందులో కేవలం 700 చెరువులే అధికారిక రికార్డుల్లో ఉన్నాయని తెలిపారు. మిగిలిన వందలాది చెరువులను గుర్తించి రికార్డుల్లోకి తీసుకురావడం, వాటిని పరిరక్షించడం లక్ష్యంగా పనిచేస్తున్నామని వెల్లడించారు.
హైడ్రా ఇప్పటివరకు సుమారు 2100 ఎకరాల ప్రభుత్వ భూములను తిరిగి స్వాధీనం చేసుకుందని, వాటి విలువ దాదాపు రూ.80 వేల కోట్లకు పైగా ఉంటుందని అంచనా వేశారు. ఇంకా లక్షల కోట్ల విలువైన భూములు ఆక్రమణలో ఉన్నాయని అధికారులు చెబుతున్నారు.
చెరువులను కేవలం నీటి వనరులుగా కాకుండా, ప్రజల జీవన ప్రమాణాలను మెరుగుపరిచే కమ్యూనిటీ స్పేస్లుగా అభివృద్ధి చేయాలనే లక్ష్యంతో ముందుకు సాగుతున్నారు. చెరువుల చుట్టూ పార్కులు, పిల్లల ఆట స్థలాలు, వాకింగ్ ట్రాక్స్ ఏర్పాటు చేయాలని ప్రణాళికలు సిద్ధం చేస్తున్నట్లు తెలిపారు.
హైడ్రా చర్యల వల్ల భూగర్భ జలాలు పెరుగుతున్నాయని కూడా అధికారులు చెబుతున్నారు. ఇటీవల కూకట్పల్లి ప్రాంతానికి చెందిన ప్రజలు, చెరువుల అభివృద్ధి కారణంగా ట్యాంకర్లపై ఆధారపడే పరిస్థితి తగ్గిందని తెలిపారని వివరించారు.
వచ్చే 10 ఏళ్లలో హైదరాబాద్లోని 1300కు పైగా చెరువులను పూర్తిస్థాయిలో అభివృద్ధి చేసి, నగరాన్ని పర్యావరణ హితంగా మార్చడమే హైడ్రా ప్రధాన లక్ష్యమని అధికారులు స్పష్టం చేశారు.
