తెలంగాణలో విద్యా రంగంలో విప్లవాత్మక మార్పులకు శ్రీకారం చుడుతూ ప్రభుత్వం తెలంగాణ పబ్లిక్ స్కూల్స్, యంగ్ ఇండియా ఇంటిగ్రేటెడ్ స్కూల్స్ ద్వారా నూతన విద్యా సంస్కరణలను అమలు చేస్తోందని జిల్లా ఇన్చార్జి మంత్రి శ్రీధర్ బాబు తెలిపారు. యాదాద్రి భువనగిరి జిల్లా ఆరుట్ల గ్రామంలో తెలంగాణ పబ్లిక్ స్కూల్ ప్రారంభోత్సవ కార్యక్రమంలో ఆయన పాల్గొని మాట్లాడారు.
ఈ సందర్భంగా మంత్రి మాట్లాడుతూ, రాష్ట్ర భవిష్యత్తును నిర్మించే ప్రధాన శక్తి విద్యేనని, విద్యావంతులైన యువతే రేపటి తెలంగాణకు బలమైన మానవ వనరులుగా మారతారని పేర్కొన్నారు. ఇటీవల ఫ్యూచర్ సిటీ నిర్మాణానికి ప్రభుత్వం శ్రీకారం చుట్టిందని, మరో పదేళ్లలో ఆ నగర అభివృద్ధిలో నేటి ప్రభుత్వ పాఠశాల విద్యార్థులే కీలక పాత్ర పోషించాలని ముఖ్యమంత్రి రేవంత్ రెడ్డి ఆకాంక్షిస్తున్నారని తెలిపారు.
విద్యా రంగంలో సంస్కరణలను కేవలం మాటలకే పరిమితం చేయకుండా ముఖ్యమంత్రి స్వయంగా విద్యాశాఖ బాధ్యతలు నిర్వహిస్తూ అమలు చేస్తున్నారని శ్రీధర్ బాబు పేర్కొన్నారు. రాష్ట్రంలో యంగ్ ఇండియా ఇంటిగ్రేటెడ్ స్కూల్స్ నిర్మాణం ఇప్పటికే ప్రారంభమైందని, అన్ని వర్గాలకు చెందిన విద్యార్థులు ఒకే చోట కలిసి చదువుకునే విధంగా ఈ విద్యా సంస్థలను రూపొందిస్తున్నామని చెప్పారు.
తెలంగాణ రాష్ట్ర ఆవిర్భావానంతరం విద్యా అవసరాలను దృష్టిలో ఉంచుకొని ప్రతి జిల్లాలో, ప్రతి మండలంలో నాణ్యమైన ప్రభుత్వ విద్య అందించాలనే లక్ష్యంతో తెలంగాణ పబ్లిక్ స్కూల్స్ ఏర్పాటు చేస్తామని కాంగ్రెస్ పార్టీ ఎన్నికల హామీల్లో పేర్కొన్న విషయాన్ని మంత్రి గుర్తు చేశారు. ఆరు గ్యారెంటీల అమలులో భాగంగా మరో కీలక హామీగా తెలంగాణ పబ్లిక్ స్కూల్ వ్యవస్థను ప్రభుత్వం ప్రారంభించిందని తెలిపారు.
ఆరుట్ల గ్రామంలో ప్రారంభమైన తెలంగాణ పబ్లిక్ స్కూల్ నూతన విద్యా విధానానికి ప్రతీకగా నిలుస్తుందని శ్రీధర్ బాబు అన్నారు. ప్రీ-ప్రైమరీ నుంచి హైస్కూల్ స్థాయి వరకు విద్యార్థులకు అత్యాధునిక సౌకర్యాలు కల్పించామని, ఏ ప్రైవేట్ పాఠశాలతో పోల్చినా ఈ పాఠశాల మరింత మెరుగ్గా ఉందని పేర్కొన్నారు.
విద్యా నాణ్యతను మరింత పెంచడంలో ఉపాధ్యాయులు, విద్యాశాఖ అధికారులు కీలక పాత్ర పోషించాల్సిన అవసరం ఉందని ఆయన సూచించారు. రాజకీయ నాయకత్వం తన బాధ్యతను నిర్వర్తిస్తోందని, అదే విధంగా పరిపాలనా యంత్రాంగం కూడా సమర్థంగా పనిచేసి ప్రభుత్వ విద్యను ఉన్నత స్థాయికి తీసుకెళ్లాలని కోరారు.
ప్రపంచ స్థాయి పోటీని ఎదుర్కొనేందుకు విద్యార్థులు నాణ్యమైన విద్యను అభ్యసించాల్సిన అవసరం ఉందని మంత్రి పేర్కొన్నారు. నేటి చిన్నారులే రేపటి తెలంగాణ, భారతదేశ భవిష్యత్తు సంపద అని, వారు అంతర్జాతీయ స్థాయిలో రాణించేలా ప్రభుత్వం విద్యా రంగాన్ని బలోపేతం చేస్తోందని తెలిపారు.
విద్య, వైద్యం రంగాలకు అత్యంత ప్రాధాన్యత ఇస్తూ ముందుకు సాగుతున్న ముఖ్యమంత్రి రేవంత్ రెడ్డి నాయకత్వంలో తెలంగాణ విద్యా వ్యవస్థ కొత్త దిశగా ప్రయాణిస్తోందని శ్రీధర్ బాబు అన్నారు. నవతరాలకు నాణ్యమైన విద్యను అందించే లక్ష్యంతో చేపడుతున్న కార్యక్రమాలకు ప్రజలందరూ సహకరించాలని పిలుపునిచ్చారు.
చివరగా తెలంగాణ పబ్లిక్ స్కూల్ ప్రారంభోత్సవం రాష్ట్ర విద్యా రంగంలో కొత్త అధ్యాయానికి నాంది పలుకుతోందని పేర్కొంటూ ముఖ్యమంత్రి రేవంత్ రెడ్డికి అభినందనలు తెలియజేశారు.
