మున్సిపల్ ఎన్నికల్లో ఏకగ్రీవాల పేరుతో కాంగ్రెస్ పార్టీ నాయకులు బెదిరింపుల రాజకీయానికి పాల్పడుతున్నారనే ఆరోపణలు తీవ్రంగా వినిపిస్తున్నాయి. నిన్న ఒక్కరోజే రాష్ట్రవ్యాప్తంగా అనేక మున్సిపాలిటీల్లో ఇదే తరహా పరిస్థితి నెలకొందని స్థానిక నాయకులు ఆరోపిస్తున్నారు.
నామినేషన్లు ఉపసంహరించుకునేలా ఒత్తిళ్లు, బెదిరింపులు, రాజకీయ డ్రామాలు చోటు చేసుకున్నాయని విమర్శలు వెల్లువెత్తుతున్నాయి. ఓట్లు వేసే పరిస్థితి కూడా లేకుండా, ముందే ఏకగ్రీవాల పేరుతో ఫలితాలను ఖరారు చేయాలని చూస్తున్నారని ఆరోపిస్తున్నారు.
ముఖ్యమంత్రి స్వయంగా “80 శాతం ప్రజాభిమానము కాంగ్రెస్కే ఉంది” అని చెబుతున్న సమయంలో, మరి ఇంతటి హడావిడి, బెదిరింపులు ఎందుకని రాజకీయ వర్గాల్లో ప్రశ్నలు తలెత్తుతున్నాయి. నిజంగా ప్రజల మద్దతు ఉంటే ఎన్నికలు స్వేచ్ఛగా జరగనివ్వాల్సిందని విమర్శకులు అంటున్నారు.
వికారాబాద్ మున్సిపాలిటీలోని 15వ వార్డు ఘటన దీనికి ఉదాహరణగా మారింది. బీఆర్ఎస్ నుంచి నామినేషన్ దాఖలు చేసిన కౌన్సిలర్ విజయలక్ష్మి–విజయ్ కుమార్ దంపతులు, ఏకగ్రీవ ప్రక్రియ అనంతరం కాంగ్రెస్ పార్టీలో చేరారు. ఈ చేరిక స్పీకర్ గడ్డం ప్రసాద్ కుమార్ ఆధ్వర్యంలో జరగడం రాజకీయంగా చర్చనీయాంశమైంది.
బీఆర్ఎస్లో ఏకగ్రీవంగా ఎంపికైన అభ్యర్థులు కాంగ్రెస్లో చేరడం, ఆ తర్వాత అదే ఏకగ్రీవాన్ని కాంగ్రెస్ విజయంగా చెప్పుకోవడం ఏ విధమైన ప్రజాస్వామ్య గెలుపని రాజకీయ విశ్లేషకులు ప్రశ్నిస్తున్నారు. “ఇది గెలుపు కాదు, ప్రజాస్వామ్యాన్ని ఖాళీ చేసే ప్రక్రియ” అన్న వ్యాఖ్యలు వినిపిస్తున్నాయి.
మరోవైపు, కాంగ్రెస్లో అంతర్గత వర్గపోరాటాలు కూడా బయటపడుతున్నాయి. జీవన్ రెడ్డి వర్గం ఒకటి, ఇటీవల బీఆర్ఎస్ నుంచి కాంగ్రెస్లో చేరిన ఎమ్మెల్యే సంజయ్ వర్గం మరోటి—ఈ రెండు వర్గాల మధ్య ఆధిపత్య పోరు కొనసాగుతోందని తెలుస్తోంది. మొదటి నుంచి కాంగ్రెస్ కోసం పనిచేసిన కార్యకర్తలను పక్కన పెట్టి, కొత్తగా వచ్చిన వర్గాలకు ప్రాధాన్యం ఇస్తున్నారనే ఆరోపణలు ఉన్నాయి.
తమ తరఫున నామినేషన్ వేయడానికి ప్రయత్నించిన వారిని బెదిరించడం, వెనక్కి తగ్గించడమే లక్ష్యంగా చర్యలు తీసుకోవడం నిన్న అనేక చోట్ల జరిగిందని కార్యకర్తలు చెబుతున్నారు. ఈ పరిణామాలన్నీ కలిపి చూస్తే, మున్సిపల్ ఎన్నికలు ఒక ప్రజాస్వామ్య ప్రక్రియగా కాకుండా, రాజకీయ హైడ్రామాగా మారాయని విమర్శలు వెల్లువెత్తుతున్నాయి.
