రాష్ట్ర ప్రభుత్వానికి, ముఖ్యంగా పోలీస్ యంత్రాంగానికి మరోసారి హెచ్చరిక చేస్తున్నామని రాజకీయ నేతలు స్పష్టం చేశారు. కాంగ్రెస్ ప్రభుత్వం అధికారంలోకి వచ్చి రెండేళ్లు పూర్తయినప్పటికీ, రాష్ట్రంలో అరాచక పరిస్థితులు కొనసాగుతున్నాయని తీవ్ర విమర్శలు చేశారు.
నల్లగొండ జిల్లాలో మల్లయ్య యాదవ్ హత్య ఉదంతాన్ని గుర్తు చేస్తూ, మొదటి విడత పోలింగ్కు ముందే దుర్మార్గంగా హత్య జరిగిందని ఆరోపించారు. అంతేకాకుండా నల్లగొండ నియోజకవర్గంలో ఓ బీసీ సోదరుడిని నామినేషన్ వేయొద్దంటూ బెదిరించి, దాడి చేసి, చివరకు కిడ్నాప్ చేసి మూత్రం తాగించారన్న ఘటనను ప్రస్తావించారు. ఈంత దారుణం జరిగినా ఇప్పటివరకు కేసు నమోదు చేయకపోవడం పోలీస్ యంత్రాంగ వైఫల్యమేనని విమర్శించారు.
ఇలాంటి ఘటనలు నల్లగొండతో మాత్రమే పరిమితం కాలేదని, కామారెడ్డి జిల్లా ఎల్లారెడ్డి, సూర్యాపేట సహా రాష్ట్రవ్యాప్తంగా జరుగుతున్నాయని తెలిపారు. ఈ అరాచకాలను ప్రజలు గమనిస్తున్నారని, పోలీస్ వ్యవస్థ ఇప్పటికైనా స్పందించి తన బాధ్యత నిర్వర్తించాలని కోరారు.
పోలీసులు తమ విధులు నిర్వహించకపోతే తామే డ్యూటీ చేయాల్సిన పరిస్థితి వస్తుందని హెచ్చరించారు. అలా జరిగితే శాంతిభద్రతల సమస్యలు తలెత్తుతాయని, దాడికి ప్రతిదాడే సమాధానంగా మారితే తామూ ప్రతిఘటించాల్సి వస్తుందని వ్యాఖ్యానించారు. అప్పుడు పరిణామాలు తీవ్రంగా ఉంటాయని, అందుకు బాధ్యత ప్రభుత్వానిదేనని స్పష్టం చేశారు.
మరో దశ ఎన్నికలు సమీపిస్తున్న నేపథ్యంలో, ముఖ్యమంత్రి తన భాషను నియంత్రించుకోవాలని సూచించారు. ఆవేశపూరిత వ్యాఖ్యలు, దూషణలతో కార్యకర్తలను రెచ్చగొట్టడం ప్రజాస్వామ్యానికి మంచిది కాదని హెచ్చరించారు. ఇకనైనా ప్రభుత్వం తన వైఖరిని సవరించుకోకపోతే రాబోయే పరిణామాలకు తామే బాధ్యత వహించాల్సి వస్తుందని అన్నారు.
అదే సమయంలో బాధిత కుటుంబాలకు పార్టీ అండగా ఉంటుందని భరోసా ఇచ్చారు. భారతీ కుటుంబానికి, అలాగే గాయపడ్డ ఇతర కుటుంబాలకు వైద్య ఖర్చులు పూర్తిగా పార్టీ నుంచే భరిస్తామని ప్రకటించారు. ప్రతి కార్యకర్తకు పార్టీ అండగా ఉంటుందని స్పష్టం చేస్తూ, నాయకులు మరియు కార్యకర్తలు సంయమనం పాటించాలని విజ్ఞప్తి చేశారు.
