హైదరాబాద్లోని నాంపల్లిలో ఉన్న సురవరం ప్రతాప్ రెడ్డి తెలుగు విశ్వవిద్యాలయం పరిరక్షణ కోసం విద్యార్థులు, పూర్వ విద్యార్థులు, అధ్యాపకులు ఆందోళన చేపట్టారు. విశ్వవిద్యాలయంలో “ఆద్యకళ” కేంద్రం ఏర్పాటు పేరుతో క్యాంపస్ స్వరూపాన్ని మార్చే ప్రయత్నాలు జరుగుతున్నాయంటూ ఆరోపిస్తూ, ప్రభుత్వం వెంటనే జోక్యం చేసుకుని ప్రస్తుత పరిస్థితిని స్పష్టంచేయాలని వారు డిమాండ్ చేశారు.
విద్యార్థి నాయకులు మాట్లాడుతూ, తెలుగు భాష, తెలంగాణ సంస్కృతి, జానపద కళలు, శిల్పం, చిత్రలేఖనం, నృత్యం, రంగస్థల కళలు వంటి అనేక సంప్రదాయ విద్యలకు ఈ విశ్వవిద్యాలయం కేంద్రంగా నిలిచిందన్నారు. ఇలాంటి చారిత్రక సంస్థను బలహీనపరిచే లేదా దాని స్వరూపాన్ని మార్చే ప్రయత్నాలను సహించబోమని హెచ్చరించారు.
విద్యార్థి సంఘం ప్రతినిధులు ఆరోపిస్తూ, “ఆద్యకళ” పేరుతో వచ్చిన ప్రతిపాదన వెనుక విశ్వవిద్యాలయాన్ని ఆక్రమించే కుట్ర జరుగుతోందని అన్నారు. ఈ ప్రతిపాదనకు సంబంధించి జయధీర్ తిరుమలరావు పాత్రపై కూడా ప్రశ్నలు లేవనెత్తుతూ, ఆయన విశ్వవిద్యాలయ వ్యవహారాల నుంచి తప్పుకోవాలని డిమాండ్ చేశారు.
ప్రస్తుతం విశ్వవిద్యాలయంలో సుమారు 2,200 మంది విద్యార్థులు చదువుతున్నారని, జ్యోతిష్యం, ఫైన్ ఆర్ట్స్, ఫ్యాషన్ డిజైనింగ్, జానపద కళలు, రంగస్థల కళలు, డిస్టెన్స్ ఎడ్యుకేషన్ వంటి అనేక కోర్సులు ఇక్కడ కొనసాగుతున్నాయని విద్యార్థులు తెలిపారు. మెట్రో స్టేషన్కు సమీపంలో ఉండటం వల్ల రాష్ట్రంలోని వివిధ ప్రాంతాల నుంచి విద్యార్థులు సులభంగా వచ్చి చదువుకునే అవకాశం ఉందని పేర్కొన్నారు.
విశ్వవిద్యాలయాన్ని బాచుపల్లి లేదా ఇతర ప్రాంతాలకు తరలించడం వల్ల విద్యార్థులకు రవాణా సమస్యలు, ఇతర అసౌకర్యాలు ఎదురవుతాయని, విద్యాభ్యాసంపై ప్రతికూల ప్రభావం పడుతుందని వారు అభిప్రాయపడ్డారు.
గత కొన్ని రోజులుగా విశ్వవిద్యాలయంలో నిరాహార దీక్షలు కొనసాగుతున్నాయని, తమ డిమాండ్లను ప్రభుత్వం పట్టించుకోకపోతే ఉద్యమాన్ని మరింత ఉధృతం చేస్తామని విద్యార్థి నాయకులు హెచ్చరించారు. అవసరమైతే సచివాలయం, అసెంబ్లీ ముట్టడికి కూడా సిద్ధమని స్పష్టం చేశారు.
పూర్వ విద్యార్థుల ఆవేదన
2000–2004 మధ్య ఫైన్ ఆర్ట్స్లో విద్యనభ్యసించిన పూర్వ విద్యార్థి శ్యామసుందర్ మాట్లాడుతూ, తెలుగు విశ్వవిద్యాలయం తెలుగు జాతి సంస్కృతి, చరిత్ర, జానపద కళలు, శిల్పం, చిత్రలేఖనం వంటి అనేక రంగాలకు నిలయంగా అభివృద్ధి చెందిందన్నారు. ప్రముఖ కవులు, కళాకారులు, సినీ రంగానికి చెందిన పలువురు ఈ విశ్వవిద్యాలయం నుంచి ఎదిగారని గుర్తుచేశారు.
ఇక్కడి నుంచి చదివిన డబ్బింగ్ ఆర్టిస్టులు, గేయరచయితలు, కళాకారులు జాతీయ, అంతర్జాతీయ స్థాయిలో గుర్తింపు పొందారని చెప్పారు. అలాంటి విశ్వవిద్యాలయం ప్రత్యేకతను దెబ్బతీసే చర్యలను ప్రభుత్వం పునరాలోచించాలని కోరారు.
“ఆద్యకళ”కు ప్రత్యేక స్థలం కేటాయించడం లేదా ఇతర అనువైన ప్రదేశంలో ఏర్పాటు చేయడం మంచిదని, కానీ తెలుగు విశ్వవిద్యాలయ స్వరూపాన్ని మార్చే ప్రయత్నం చేయవద్దని సూచించారు. వరంగల్, మేడారం లేదా గిరిజన విశ్వవిద్యాలయాల వంటి అనువైన ప్రాంతాల్లో అలాంటి కేంద్రాన్ని ఏర్పాటు చేయవచ్చని అభిప్రాయపడ్డారు.
తెలంగాణ ఏర్పడిన తర్వాత ఈ విశ్వవిద్యాలయానికి సురవరం ప్రతాప్ రెడ్డి పేరు పెట్టడం వెనుక తెలంగాణ చరిత్ర, భాష, సంస్కృతిని భావితరాలకు అందించాలనే లక్ష్యం ఉందని, ఆ లక్ష్యాన్ని కాపాడుకోవాల్సిన బాధ్యత ప్రభుత్వంపై ఉందన్నారు.
విశ్వవిద్యాలయ పరిరక్షణ కోసం విద్యార్థులు, పూర్వ విద్యార్థులు, అధ్యాపకులు కలిసి ఉద్యమాన్ని కొనసాగిస్తామని, ప్రభుత్వం త్వరగా సానుకూల నిర్ణయం తీసుకోవాలని విజ్ఞప్తి చేశారు.
