హైదరాబాద్: యూసఫ్గూడ ప్రాంతంలో రోడ్లు, కొన్ని మౌలిక సదుపాయాలు మెరుగుపడినప్పటికీ డ్రైనేజీ, వర్షపు నీటి నిల్వ, తాగునీటి సమస్యలు ఇంకా కొనసాగుతున్నాయని స్థానికులు ఆవేదన వ్యక్తం చేస్తున్నారు. ఎన్నికల సమయంలో నాయకులు హామీలు ఇస్తున్నప్పటికీ శాశ్వత పరిష్కారం మాత్రం కనిపించడం లేదని అంటున్నారు.
పదేళ్లుగా యూసఫ్గూడలో నివసిస్తున్న ఓ మహిళ మాట్లాడుతూ, ఎమ్మెల్యే నవీన్ యాదవ్ హయాంలో కొన్ని అభివృద్ధి పనులు జరిగాయని, రోడ్లు లేని చోట కొత్త రోడ్లు నిర్మిస్తున్నారని చెప్పారు. అయితే స్థానిక కార్పొరేటర్లు పండుగలు లేదా అత్యవసర పరిస్థితుల్లో మాత్రమే కనిపిస్తారని, సాధారణ రోజుల్లో ప్రజల సమస్యలను పట్టించుకోవడం లేదని పేర్కొన్నారు.
ప్రధానంగా వర్షాకాలంలో నాలుగు వైపుల నుంచి వర్షపు నీరు వచ్చి తమ కాలనీలో చేరుతుందని, వాహనాలు పూర్తిగా మునిగిపోయే పరిస్థితి ఏర్పడుతుందని తెలిపారు. రోడ్డును ఎత్తు చేయాల్సిన అవసరం ఉన్నప్పటికీ ఇప్పటి వరకు ఆ సమస్యకు పరిష్కారం లభించలేదని చెప్పారు. వర్షం పడిన ప్రతిసారి వాహనాలను సురక్షిత ప్రాంతాలకు తరలించాల్సి వస్తోందని వివరించారు.
నీటి సరఫరా ప్రస్తుతం కొంత మెరుగ్గా ఉన్నప్పటికీ గత వేసవిలో తీవ్ర ఇబ్బందులు ఎదుర్కొన్నామని తెలిపారు. కరెంట్ సరఫరా మాత్రం ప్రస్తుతం సంతృప్తికరంగా ఉందని, ముందస్తు సమాచారం ఇవ్వడం వల్ల ఇబ్బందులు తక్కువగా ఉన్నాయని చెప్పారు.
1985 నుంచి యూసఫ్గూడలో ఉంటున్న మరో స్థానికుడు మాట్లాడుతూ గతంతో పోలిస్తే భవనాలు పెరిగినా, డ్రైనేజీ, తాగునీటి సమస్యలు మాత్రం అలాగే ఉన్నాయని పేర్కొన్నారు. ముఖ్యంగా కొన్ని ప్రాంతాల్లో డ్రైనేజీ నీరు తాగునీటి పైపుల్లోకి చేరుతుండటంతో ప్రజలు ఆ నీటిని తాగడానికి ఉపయోగించలేకపోతున్నారని ఆందోళన వ్యక్తం చేశారు.
స్థానిక సమస్యలపై పలుమార్లు అధికారులకు, ప్రజాప్రతినిధులకు ఫిర్యాదు చేసినప్పటికీ శాశ్వత పరిష్కారం లభించలేదని తెలిపారు. ఎన్నికల సమయంలో నాయకులు ప్రజల వద్దకు వచ్చి హామీలు ఇస్తారని, కానీ ఎన్నికల తర్వాత సమస్యలు పరిష్కరించడంలో ఆశించిన స్థాయిలో స్పందన ఉండటం లేదని విమర్శించారు.
రాబోయే గ్రేటర్ హైదరాబాద్ మున్సిపల్ ఎన్నికల్లో అభ్యర్థులు ప్రజల ముందుకు వస్తే తమ ప్రాంతంలో ఉన్న డ్రైనేజీ, వర్షపు నీటి నిల్వ, తాగునీటి సమస్యల పరిష్కారంపై స్పష్టమైన హామీలు కోరుతామని స్థానికులు స్పష్టం చేశారు.
