హైదరాబాద్ నగరంలో పర్యావరణ పరిరక్షణపై మరోసారి తీవ్ర చర్చ మొదలైంది. ముఖ్యంగా కేబీఆర్ పార్క్ పరిసరాల్లో ప్రతిపాదిత ఫ్లైఓవర్లు, రోడ్డు విస్తరణ పనుల కోసం చెట్ల తొలగింపుపై యువత, పర్యావరణ కార్యకర్తలు ఆందోళన వ్యక్తం చేస్తున్నారు. “సేవ్ కేబీఆర్” పేరుతో ఉద్యమం చేపట్టిన యువకులు, పర్యావరణవేత్తలు ప్రభుత్వ నిర్ణయాలను ప్రశ్నిస్తూ రోడ్లపైకి వస్తున్నారు. ఈ నేపథ్యంలో ఉద్యమకారుడు విజయ్ కుమార్ కీలక వ్యాఖ్యలు చేశారు.
“ప్రభుత్వాలే ప్రజలకు చెట్లను కాపాడండి, పర్యావరణాన్ని రక్షించండి అని చెప్పాల్సిన పరిస్థితి నుంచి ఈరోజు ప్రజలే ప్రభుత్వాలను వేడుకునే స్థితికి వచ్చాం” అంటూ ఆయన ఆవేదన వ్యక్తం చేశారు. కేబీఆర్ పార్క్ చుట్టూ భారీ స్థాయిలో చెట్లు తొలగించడం వల్ల హైదరాబాద్ నగర భవిష్యత్తు ప్రమాదంలో పడుతుందని హెచ్చరించారు.
విజయ్ కుమార్ మాట్లాడుతూ గతంలో హెచ్సీయూ భూముల విషయంలో కూడా యువత పోరాడిందని, ఇప్పుడు కేబీఆర్ పార్క్ విషయంలో కూడా అదే తరహా ఉద్యమం కొనసాగుతోందని తెలిపారు. అర్ధరాత్రి సమయంలో చెట్ల తొలగింపును అడ్డుకునేందుకు ప్రయత్నించిన యువతను పోలీసులు అరెస్ట్ చేయడం బాధాకరమన్నారు. పర్యావరణాన్ని కాపాడాలని అడిగితే కేసులు పెట్టడం, పోలీస్ స్టేషన్లకు తీసుకెళ్లడం ఎంతవరకు సమంజసమని ప్రశ్నించారు.
ఇటీవల సుప్రీంకోర్టు కూడా ఈ అంశంపై కీలక ఆదేశాలు జారీ చేసింది. కేబీఆర్ పార్క్ పరిసరాల్లో 25 నుంచి 35 మీటర్ల వరకు బఫర్ జోన్ తప్పనిసరిగా ఉండాలని, ఆ పరిధిలో చెట్ల తొలగింపుపై స్టే విధించింది. ఈ అంశంపై విజయ్ కుమార్ మాట్లాడుతూ “ఒక ఇంటికి కాంపౌండ్ వాల్ ఎంత ముఖ్యమో, కేబీఆర్ పార్క్కు బఫర్ జోన్ అంతే ముఖ్యమైనది” అన్నారు.
అధికారులు ఎక్కడ నచ్చితే అక్కడ మూడు మీటర్లు, ఇంకొన్ని చోట్ల 28 మీటర్లు అంటూ ఇష్టారాజ్యంగా వ్యవహరిస్తున్నారని విమర్శించారు. ప్రజాభిప్రాయం తీసుకోకుండా, పబ్లిక్ హియరింగ్ నిర్వహించకుండా ప్రాజెక్టులను ముందుకు తీసుకెళ్తున్నారని ఆరోపించారు. అందుకే శాస్త్రవేత్తలు, పర్యావరణ కార్యకర్తలు కలిసి కోర్టును ఆశ్రయించామని తెలిపారు.
హైదరాబాద్ నగరంలో గత పదేళ్లుగా వేల కోట్ల రూపాయలు ఫ్లైఓవర్ల నిర్మాణానికి ఖర్చు చేసినా ట్రాఫిక్ సమస్య తగ్గలేదని విజయ్ కుమార్ అన్నారు. “ఒక ఫ్లైఓవర్ నిర్మిస్తే ట్రాఫిక్ మరో జంక్షన్కి మారుతుంది కానీ సమస్య పూర్తిగా తగ్గదు” అని పేర్కొన్నారు. కేబీఆర్ పార్క్ చుట్టూ ఉన్న ప్రతి జంక్షన్లో ఇప్పటికీ ట్రాఫిక్ ఇబ్బందులు కొనసాగుతున్నాయని చెప్పారు.
కేబీఆర్ చెక్పోస్ట్ నుంచి మాదాపూర్ జంక్షన్, రోడ్ నెంబర్ 5, టీవీ9 సర్కిల్, జూబ్లీహిల్స్, విరించి హాస్పిటల్ ప్రాంతాల్లో వాహనదారులు గంటల తరబడి ట్రాఫిక్లో ఇరుక్కుంటున్నారని వివరించారు. ఫ్లైఓవర్లు తాత్కాలిక ఉపశమనం మాత్రమే ఇస్తాయని, శాశ్వత పరిష్కారం ప్రజా రవాణా వ్యవస్థ బలోపేతమేనని అభిప్రాయపడ్డారు.
“ప్రభుత్వం మరో ఫ్లైఓవర్ కోసం వెయ్యి కోట్లు ఖర్చు పెట్టడం కంటే, అదే డబ్బుతో వేల సంఖ్యలో బస్సులు కొనుగోలు చేస్తే ప్రజలకు మేలు జరుగుతుంది” అన్నారు. హైదరాబాద్లో ఇప్పటికీ లక్షల సంఖ్యలో కార్లు రోడ్లపైకి వస్తుండటంతో ట్రాఫిక్ తీవ్రంగా పెరుగుతోందని చెప్పారు. ప్రజలు కార్లు వాడకుండా ఉండాలంటే బలమైన ప్రజా రవాణా వ్యవస్థ ఉండాలని పేర్కొన్నారు.
హైటెక్ సిటీ, ఫైనాన్షియల్ డిస్ట్రిక్ట్, నార్సింగి, కోకాపేట్ ప్రాంతాలకు మెట్రో విస్తరించాల్సిన అవసరం ఉందని ఆయన సూచించారు. ప్రస్తుతం ప్రజలు మెట్రో సదుపాయం లేక కార్లపై ఆధారపడుతున్నారని, అందుకే ట్రాఫిక్ సమస్య పెరుగుతోందని తెలిపారు.
అర్ధరాత్రి సమయంలో శాంతియుతంగా నిరసన తెలుపుతున్న వారిపై బంజారాహిల్స్ పోలీసులు క్రిమినల్ కేసులు నమోదు చేయడాన్ని విజయ్ కుమార్ తీవ్రంగా ఖండించారు. “మేము చెట్లను కాపాడండి అని అడిగితే క్రిమినల్ ఇంటిమిడేషన్ కేసులు పెట్టడం బాధాకరం” అన్నారు. ప్రజాస్వామ్యంలో ప్రశ్నించే హక్కు కూడా లేకుండా చేస్తున్నారని ఆరోపించారు.
సుప్రీంకోర్టు ఇచ్చిన స్టే ఆర్డర్పై ఆనందం వ్యక్తం చేసిన ఆయన, తమ తరఫున వాదించిన న్యాయవాదులకు, న్యాయమూర్తులకు కృతజ్ఞతలు తెలిపారు. అయితే ఈ పోరాటం కోర్టుల వరకే పరిమితం కాకూడదని, ప్రజలు కూడా ముందుకు రావాలని పిలుపునిచ్చారు.
“కేబీఆర్ ముద్దు.. ఫ్లైఓవర్ వద్దు” అనే నినాదంతో ఉద్యమం కొనసాగుతుందని, పర్యావరణ పరిరక్షణ కోసం ప్రజలంతా ఐక్యంగా నిలవాలని కార్యకర్తలు కోరుతున్నారు. హైదరాబాద్ భవిష్యత్తు కోసం చెట్లను కాపాడుకోవడం తప్పనిసరి అని, అభివృద్ధి పేరుతో ప్రకృతిని నాశనం చేయకూడదని స్పష్టం చేస్తున్నారు.
