భాగ్యనగర వాసులకు, ముఖ్యంగా పాతబస్తీ ప్రజలకు ఎంతోకాలంగా ఎదురుచూస్తున్న తీపి కబురు వచ్చింది. దశాబ్దాలుగా చర్చల్లోనే ఉన్న ఓల్డ్ సిటీ మెట్రో ప్రాజెక్ట్ ఇప్పుడు నిజం కావడానికి అడుగులు వేస్తోంది. రాష్ట్ర ప్రభుత్వం ప్రతిష్టాత్మకంగా చేపడుతున్న హైదరాబాద్ మెట్రో రెండో దశ విస్తరణలో అత్యంత కీలకమైన ఓల్డ్ సిటీ కారిడార్ పనులు ఇప్పుడు రాకెట్ వేగంతో ముందుకు సాగుతున్నాయి.
ఈ ప్రాజెక్ట్కు ప్రధాన అడ్డంకిగా భావించిన భూసేకరణ ప్రక్రియ ఇప్పుడు ముగింపు దశకు చేరుకుంది. అధికార వర్గాల సమాచారం ప్రకారం ఇప్పటికే దాదాపు 80 శాతం భూసేకరణ విజయవంతంగా పూర్తయ్యింది. మిగిలిన 20 శాతం భూముల స్వాధీనానికి అధికారులు స్థానిక నిర్వాసితులతో ముమ్మర చర్చలు జరుపుతున్నారు. ఆస్తులు కోల్పోతున్న వారికి నష్టపరిహారం, పునరావాస ప్యాకేజీలపై అవగాహన కల్పిస్తూ వారిని ఒప్పించే ప్రయత్నాలు చేస్తున్నారు.
బక్రీద్ పండుగ ముగిసిన వెంటనే మిగిలిన భూసేకరణను కూడా 100 శాతం పూర్తి చేయాలని ప్రభుత్వం ప్రత్యేక కార్యాచరణతో ముందుకు సాగుతోంది. భూసేకరణతో పాటు పరిపాలనా పరమైన పనులు కూడా వేగంగా జరుగుతున్నాయి. మెట్రో రెండో దశ పనుల పర్యవేక్షణ కోసం జనరల్ కన్సల్టెంట్ల నియామకానికి ఇటీవల టెండర్లు కూడా పిలిచారు. ఈ టెండర్లకు జూన్ 5 వరకు గడువు నిర్ణయించారు.
టెండర్లలో ఎంపికయ్యే కన్సల్టెన్సీ సంస్థ మూడు నెలల వ్యవధిలో ఓల్డ్ సిటీ మెట్రో కారిడార్కు సంబంధించిన పూర్తి స్థాయి డిజైన్ను సిద్ధం చేయనుంది. అదే డిజైన్ ఆధారంగా భవిష్యత్తులో మెట్రో పిల్లర్లు, స్టేషన్లు, ట్రాక్ నిర్మాణం చేపట్టబడుతుంది. పనుల నాణ్యత, నిర్మాణ పర్యవేక్షణ బాధ్యతలు కూడా ఈ సంస్థదే కానున్నాయి.
హైదరాబాద్ మెట్రో రెండో దశ విస్తరణలో భాగంగా మొత్తం ఎనిమిది కారిడార్లను ప్రభుత్వం ప్రతిపాదించింది. ఇందులో అత్యంత ప్రాధాన్యమైన కారిడార్-6 కింద ఎంజీబీఎస్ నుంచి చంద్రయాన్గుట్ట వరకు మెట్రో మార్గాన్ని నిర్మించనున్నారు. మొత్తం 7.5 కిలోమీటర్ల పొడవు గల ఈ కారిడార్కు సంబంధించిన డీటెయిల్డ్ ప్రాజెక్ట్ రిపోర్ట్ ఇప్పటికే సిద్ధమైంది.
ఈ ప్రాజెక్ట్ కోసం కేంద్ర, రాష్ట్ర ప్రభుత్వాలు కలిసి సంయుక్తంగా దాదాపు రూ. 2,741 కోట్ల భారీ వ్యయాన్ని కేటాయించనున్నట్లు సమాచారం. కేంద్ర ప్రభుత్వం నుంచి డీపీఆర్కు తుది ఆమోదం వచ్చిన వెంటనే పాతబస్తీలో నిర్మాణ పనులు ప్రారంభించేందుకు రాష్ట్ర ప్రభుత్వం సిద్ధంగా ఉంది.
పాతబస్తీలో మెట్రో అందుబాటులోకి వస్తే ట్రాఫిక్ సమస్యలు గణనీయంగా తగ్గే అవకాశం ఉందని నిపుణులు భావిస్తున్నారు. అంతేకాకుండా వ్యాపార రంగం, రియల్ ఎస్టేట్, స్థానిక ఉపాధి అవకాశాలకు కూడా ఈ ప్రాజెక్ట్ భారీ ఊతమివ్వనుంది. దశాబ్దాలుగా అభివృద్ధి కోసం ఎదురుచూస్తున్న పాతబస్తీ ప్రజలకు ఈ మెట్రో ప్రాజెక్ట్ కీలక మలుపు కానుందని విశ్లేషకులు చెబుతున్నారు.
ఇప్పటికే నగరంలో మెట్రో సేవలు ప్రజా రవాణాలో కీలక పాత్ర పోషిస్తున్న నేపథ్యంలో, ఓల్డ్ సిటీ మెట్రో కూడా హైదరాబాద్ అభివృద్ధికి మరో కొత్త అధ్యాయంగా మారబోతోందనే అభిప్రాయం వ్యక్తమవుతోంది.
