తెలంగాణలో ప్రస్తుతం నెలకొన్న కరువు పరిస్థితులు ప్రకృతి వైపరీత్యం వల్ల కాదని, ప్రభుత్వ వైఫల్యం వల్లనే ఏర్పడ్డాయని బీఆర్ఎస్ నాయకులు తీవ్ర విమర్శలు చేశారు. కాళేశ్వరం ప్రాజెక్టు విషయంలో కాంగ్రెస్ ప్రభుత్వం అనుసరిస్తున్న వైఖరిని తప్పుబడుతూ, రెండు పియర్లు దెబ్బతిన్నప్పటికీ 30 నెలలు గడిచినా మరమ్మతులు పూర్తి చేయలేకపోవడం ప్రభుత్వ అసమర్థతకు నిదర్శనమని పేర్కొన్నారు.
కేసీఆర్ దూరదృష్టి ఫలితంగానే కాళేశ్వరం ప్రాజెక్టు ద్వారా ఉత్తర తెలంగాణ నుంచి హైదరాబాద్ తాగునీటి అవసరాలు, పారిశ్రామిక అవసరాలు, అనేక జిల్లాల సాగునీటి అవసరాలు తీరాయని గుర్తుచేశారు. అలాంటి ప్రాజెక్టును రాజకీయ కుట్రలతో అపఖ్యాతిపాలు చేయాలని ప్రయత్నిస్తున్నారని ఆరోపించారు.
రైతుల సమస్యలపై కూడా ప్రభుత్వాన్ని నిలదీశారు. ధాన్యం కొనుగోళ్లలో అధిక తూకం పేరుతో రైతులను మోసం చేస్తున్నారని, ప్రతి క్వింటాల్కు సుమారు 10 కిలోల వరకు కోత విధించడం వల్ల ఒక్కో ఎకరానికి రూ.6 వేల వరకు రైతులు నష్టపోతున్నారని ఆరోపించారు.
ధర్మకాంటా వద్ద నమోదయ్యే అసలు బరువుకు అనుగుణంగా రైతులకు చెల్లింపులు జరగడం లేదని, ట్రక్ షీట్లలో కోతలు విధించి చెల్లింపులు చేస్తున్నారని చెప్పారు. ధర్మకాంటా రికార్డులు, ట్రక్ షీట్లను బహిర్గతం చేసి రైతులకు న్యాయం చేయాలని డిమాండ్ చేశారు.
రైతు భరోసా సక్రమంగా అందడం లేదని, సన్నబియ్యానికి బోనస్ పేరుతో ఇచ్చిన హామీలు కూడా పూర్తిగా అమలు కావడం లేదని విమర్శించారు. ప్రభుత్వం పంటల మార్పిడి సూచనలు చేస్తున్నప్పటికీ, ప్రత్యామ్నాయ పంటలకు గిట్టుబాటు ధర, ప్రోత్సాహకాలు ప్రకటించడంలో స్పష్టత లేదన్నారు.
తెలంగాణలో ప్రస్తుతం కొనసాగుతున్నది “ప్రజా పాలన కాదు, ప్రజా వంచన పాలన” అని ఆరోపించిన బీఆర్ఎస్ నాయకులు, రాష్ట్రంలో రైతుల సంక్షేమం కోసం కాళేశ్వరం పునరుద్ధరణతో పాటు కేసీఆర్ మళ్లీ ముఖ్యమంత్రి కావాల్సిన అవసరం ఉందని అభిప్రాయపడ్డారు.
వచ్చే రోజుల్లో రైతుల సమస్యలపై ప్రజాక్షేత్రంలో పోరాటాన్ని మరింత ఉధృతం చేస్తామని హెచ్చరించారు.
