తెలుగు సినిమాలను అక్రమంగా ప్రసారం చేసే పైరసీ వెబ్సైట్లు మళ్లీ యాక్టివ్ కావడం సినీ పరిశ్రమలో ఆందోళన కలిగిస్తోంది. ముఖ్యంగా iBOMMA, బప్పం టీవీ, మూవీ రూల్స్ వంటి వెబ్సైట్లు కొత్త డొమైన్లతో తిరిగి అందుబాటులోకి వచ్చాయని ప్రచారం జరుగుతోంది. ఇటీవల విడుదలైన తెలుగు సినిమాలు, తమిళ చిత్రాలు, వెబ్ సిరీస్లు ఈ సైట్లలో దర్శనం ఇవ్వడం చర్చనీయాంశమైంది.
కొద్ది నెలల క్రితం iBOMMA Ravi అరెస్ట్ తర్వాత ఈ సైట్లు నిలిచిపోయినట్టే కనిపించాయి. అప్పట్లో భారీగా డేటా సేకరణ, బెట్టింగ్ యాప్స్ ప్రమోషన్, యూజర్ల వ్యక్తిగత సమాచార దుర్వినియోగం వంటి ఆరోపణలు వెలువడ్డాయి. దాదాపు 50 లక్షల మంది యూజర్ల డేటా ప్రమాదంలో పడిందని ప్రచారం జరిగింది. అయితే ఆ డేటా పరిస్థితి ఏమైంది? ఎవరి చేతికి వెళ్లింది? దాని దుర్వినియోగం జరిగిందా లేదా? అనే అంశాలపై ఇప్పటికీ స్పష్టత రాలేదని విమర్శలు వినిపిస్తున్నాయి.
సినిమా విడుదలైన కొద్దిసేపటికే పైరసీ వెబ్సైట్లలో కనిపించడం వెనుక పెద్ద నెట్వర్క్ పనిచేస్తోందనే అనుమానాలు వ్యక్తమవుతున్నాయి. థియేటర్లలో ఫస్ట్ షో పూర్తికాకముందే సినిమాలు లీక్ అవుతున్నాయంటే అంతర్గత సమాచారం, సాంకేతిక మద్దతు లేకుండా ఇది సాధ్యం కాదని సినీ వర్గాలు భావిస్తున్నాయి.
ఇక సైబర్ నిపుణులు మాత్రం ఇలాంటి పైరసీ వెబ్సైట్ల విషయంలో యూజర్లు అత్యంత జాగ్రత్తగా ఉండాలని హెచ్చరిస్తున్నారు. అనుమానాస్పద లింకులపై క్లిక్ చేయడం వల్ల మొబైల్ డేటా, బ్యాంకింగ్ సమాచారం, వ్యక్తిగత ఫోటోలు, వీడియోలు ప్రమాదంలో పడే అవకాశం ఉంటుందని చెబుతున్నారు. ముఖ్యంగా ఫేక్ యాప్స్, పాప్-అప్ అడ్స్, బెట్టింగ్ లింకులు ద్వారా మోసాలు జరిగే ప్రమాదం ఎక్కువగా ఉందని సూచిస్తున్నారు.
సినిమా టికెట్ ఖర్చులు ఎక్కువగా ఉన్నాయని లేదా ఉచితంగా సినిమా చూడాలని భావించి ఇలాంటి వెబ్సైట్లను వాడటం చివరికి యూజర్లకే ప్రమాదంగా మారొచ్చని హెచ్చరికలు వస్తున్నాయి. పైరసీని ప్రోత్సహించడం వల్ల సినిమా పరిశ్రమకు నష్టం కలగడమే కాకుండా, వ్యక్తిగత డేటా భద్రత కూడా ప్రమాదంలో పడే అవకాశం ఉందని నిపుణులు చెబుతున్నారు.
