తెలంగాణలోని Jangaon జిల్లాలో అమానుష ఘటన వెలుగులోకి వచ్చింది. రూ.20 లక్షల అప్పు తీర్చేందుకు ఓ తండ్రి, సవతి తల్లి కలిసి 18 ఏళ్ల యువతిని 45 ఏళ్ల వ్యక్తికి బలవంతంగా పెళ్లి చేసిన ఘటన తీవ్ర కలకలం రేపుతోంది. ఈ ఘటన Bachannapeta మండలంలో చోటు చేసుకుంది.
బాధిత యువతి తెలిపిన వివరాల ప్రకారం, బచ్చన్నపేటకు చెందిన రాకేష్ గౌడ్ కొన్నేళ్ల క్రితం ఓ ఎస్టీ మహిళను వివాహం చేసుకున్నాడు. వారికి ప్రస్తుతం 18 ఏళ్ల కుమార్తె ఉంది. అనంతరం మొదటి భార్యను వదిలేసి, తన సామాజిక వర్గానికి చెందిన మరో మహిళను పెళ్లి చేసుకున్నాడు.
ఇటీవల రాకేష్ గౌడ్ తీవ్ర ఆర్థిక ఇబ్బందుల్లో పడడంతో సుమారు రూ.20 లక్షల అప్పు చేసినట్లు తెలుస్తోంది. అప్పు తీర్చేందుకు స్థానికంగా రాజకీయంగా ప్రభావం కలిగిన వ్యక్తి అయిన Avula Prashanth Reddy వద్దకు వెళ్లినట్లు సమాచారం. ఈ సమయంలో “నీ అప్పు మొత్తం నేను తీర్చేస్తా.. నీ కుమార్తెను నాకు పెళ్లి చేయాలి” అని ప్రశాంత్ రెడ్డి షరతు పెట్టినట్లు ఆరోపణలు వినిపిస్తున్నాయి.
ఆర్థిక ఒత్తిడితో తండ్రి, సవతి తల్లి ఇద్దరూ కలిసి యువతిపై తీవ్ర ఒత్తిడి తెచ్చారని, పెళ్లికి ఒప్పుకోకపోతే విషం ఇచ్చి చంపేస్తామని బెదిరించారని బాధితురాలు వెల్లడించింది. ఈ నెల 8వ తేదీన స్థానిక ఆలయంలో బలవంతంగా పెళ్లి జరిపించి, అనంతరం ఆమెను ప్రశాంత్ రెడ్డి ఇంటికి పంపించినట్లు తెలిపింది.
అయితే ఈ పెళ్లి తనకు ఇష్టం లేకపోవడంతో బాధిత యువతి తన స్నేహితుల సహాయంతో అక్కడి నుంచి తప్పించుకుని Hyderabad చేరుకుంది. అనంతరం మహిళా కమిషన్ను ఆశ్రయించి తనకు జరిగిన అన్యాయాన్ని వివరించింది. తర్వాత Ranga Reddy District Court వద్దకు వెళ్లి మీడియా ముందుకు వచ్చి కన్నీటి పర్యంతమైంది.
తనకు ప్రాణహాని ఉందని, రాష్ట్ర ప్రభుత్వం మరియు మహిళా కమిషన్ రక్షణ కల్పించాలని బాధితురాలు కోరుతోంది. ఇప్పటికే రాష్ట్ర డీజీపీ, జిల్లా ఎస్పీకి ఫిర్యాదు చేసినట్లు బాధితురాలి తరఫు న్యాయవాది Gyara Satish తెలిపారు.
ఇంకా షాకింగ్ విషయం ఏమిటంటే, యువతిని తప్పించేందుకు సహకరించిన ఆమె స్నేహితులపై కూడా స్థానిక పోలీస్ స్టేషన్లో కేసులు నమోదు చేసినట్లు సమాచారం.
ఈ ఘటనపై మహిళా సంఘాలు, సామాజిక కార్యకర్తలు తీవ్ర ఆగ్రహం వ్యక్తం చేస్తున్నారు. అప్పుల కోసం సొంత కుమార్తె భవిష్యత్తును తాకట్టు పెట్టడం అత్యంత దారుణమని విమర్శిస్తున్నారు. యువతి వయసు కేవలం 18 ఏళ్లు మాత్రమే కాగా, 45 ఏళ్ల వ్యక్తితో బలవంతపు వివాహం చేయడం చట్టపరంగానే కాక మానవత్వపరంగానూ నేరమని పేర్కొంటున్నారు.
