తెలంగాణ రాష్ట్రంలో ప్రైవేట్ స్కూల్స్, కార్పొరేట్ విద్యాసంస్థల ఫీజుల పెరుగుదలపై తీవ్ర ఆందోళనలు వ్యక్తమవుతున్నాయి. విద్యారంగంలో జరుగుతున్న మార్పులతో పాటు ప్రతి ఏడాది ఫీజులు భారీగా పెరుగుతుండటంతో మధ్యతరగతి, సామాన్య కుటుంబాలు తీవ్ర ఇబ్బందులు ఎదుర్కొంటున్నాయని తల్లిదండ్రుల సంఘాలు, విద్యార్థి సంఘాలు ఆవేదన వ్యక్తం చేస్తున్నాయి. ఈ నేపథ్యంలో హైదరాబాద్ ప్రెస్ క్లబ్లో రౌండ్ టేబుల్ సమావేశం నిర్వహించి ప్రభుత్వంపై ఒత్తిడి తీసుకురావాలని నిర్ణయించారు.
సమావేశంలో మాట్లాడిన ప్రతినిధులు తెలంగాణలో సుమారు 47 లక్షల మంది విద్యార్థులు ప్రైవేట్ స్కూళ్లలో చదువుతున్నారని తెలిపారు. ప్రభుత్వ పాఠశాలలు సరిపడా అందుబాటులో లేకపోవడంతో తల్లిదండ్రులు లక్షల రూపాయలు ఖర్చు చేసి ప్రైవేట్ విద్యాసంస్థలను ఆశ్రయించాల్సి వస్తోందన్నారు. అయితే ప్రైవేట్ స్కూల్స్ ఎంత ఫీజులు వసూలు చేస్తున్నాయి, దేనికి ఎంత ఖర్చు చేస్తున్నాయి అనే విషయాల్లో ఎలాంటి పారదర్శకత లేదని విమర్శించారు.
ప్రభుత్వం వెంటనే “ఫీజ్ నియంత్రణ చట్టం” తీసుకురావాలని సమావేశంలో తీర్మానం చేశారు. తెలంగాణ ఎడ్యుకేషన్ కమిషన్ ఇప్పటికే ఒక డ్రాఫ్ట్ను ప్రభుత్వానికి సమర్పించిందని, దాన్ని అమలు చేయాలని డిమాండ్ చేశారు. ఆ చట్టం అమలులోకి వస్తే స్వయం ప్రతిపత్తి గల కమిటీ ఏర్పడి ప్రైవేట్ స్కూళ్లు తమ ఖర్చుల వివరాలు వెల్లడించాల్సి ఉంటుందని తెలిపారు. అదే సమయంలో తల్లిదండ్రులకు కూడా కమిటీల్లో ప్రాతినిధ్యం కల్పించాలని సూచించారు.
తల్లిదండ్రుల సంఘాల ప్రతినిధులు మాట్లాడుతూ, “తెలంగాణలో ఎక్కువశాతం కుటుంబాల ఆదాయం సంవత్సరానికి లక్ష రూపాయల లోపే ఉంటుంది. అలాంటి పరిస్థితుల్లో పిల్లల చదువుల కోసం భారీ ఫీజులు ఎలా చెల్లించాలి?” అని ప్రశ్నించారు. విద్య అందించడం ప్రభుత్వ బాధ్యత అని, అందుకే ప్రైవేట్ విద్యాసంస్థలపై నియంత్రణ తప్పనిసరి అని పేర్కొన్నారు.
విద్యార్థి సంఘం ఏఐఎస్ఎఫ్ రాష్ట్ర కార్యదర్శి మాట్లాడుతూ కాంగ్రెస్ ప్రభుత్వం ఎన్నికల సమయంలో ప్రైవేట్ విద్యాసంస్థల ఫీజుల దోపిడీని అరికడతామని హామీ ఇచ్చిందని గుర్తు చేశారు. కానీ అధికారంలోకి వచ్చి రెండున్నర సంవత్సరాలు అయినప్పటికీ ఎలాంటి చర్యలు తీసుకోలేదని విమర్శించారు. సీబీఎస్ఈ, ఇంటర్నేషనల్, కార్పొరేట్ స్కూల్స్ వేల నుంచి లక్షల రూపాయల వరకు ఫీజులు పెంచుతున్నా ప్రభుత్వం స్పందించడం లేదన్నారు.
ఫీజులు కట్టలేక విద్యార్థుల తల్లిదండ్రులు మానసిక ఒత్తిడికి గురవుతున్నారని, కొన్ని విద్యాసంస్థలు ముందస్తు ఫీజులు బలవంతంగా వసూలు చేస్తున్నాయని ఆరోపించారు. ఈ వ్యవహారంపై హైకోర్టు, మానవ హక్కుల కమిషన్ కూడా జోక్యం చేసుకున్నాయని తెలిపారు. ముందస్తు ఫీజుల వసూళ్లు చేయవద్దని ఆదేశాలు వచ్చినప్పటికీ వాటిని అమలు చేయడంలో ప్రభుత్వం విఫలమైందని అన్నారు.
అలాగే పెండింగ్లో ఉన్న ఫీజు రీయింబర్స్మెంట్ బకాయిలను కూడా వెంటనే విడుదల చేయాలని డిమాండ్ చేశారు. ప్రస్తుతం సుమారు రూ.11,500 కోట్ల రీయింబర్స్మెంట్ బకాయిలు పెండింగ్లో ఉన్నాయని, దాదాపు 14 లక్షల మంది విద్యార్థుల చదువులు దీనిపై ఆధారపడి ఉన్నాయని తెలిపారు. పేద విద్యార్థుల ఉన్నత విద్యకు ఇది కీలకమని పేర్కొన్నారు.
ప్రభుత్వం ఇతర సంక్షేమ పథకాలకు నిధులు కేటాయిస్తున్నప్పుడు విద్యారంగానికి మాత్రం బడ్జెట్ లేదని చెప్పడం సరైంది కాదని విద్యార్థి సంఘాలు ప్రశ్నించాయి. విద్యార్థులకు ఓటు హక్కు లేకపోవడంతోనే ప్రభుత్వం నిర్లక్ష్యం చేస్తోందని ఆరోపించాయి.
ఫీజ్ నియంత్రణ చట్టం అమలు చేయకపోతే భవిష్యత్తులో విద్యార్థులు, తల్లిదండ్రులతో కలిసి రాష్ట్రవ్యాప్తంగా పెద్ద ఎత్తున ఉద్యమాలు చేపడతామని విద్యార్థి సంఘాలు హెచ్చరించాయి.
