హైదరాబాద్ ట్రాఫిక్ సమస్యలు, యూటర్న్ల వ్యవస్థ, రోడ్డు భద్రత, డ్రగ్స్ ముప్పు, సైబర్ నేరాలపై తెలంగాణ డీజీపీ C. V. Anand కీలక వ్యాఖ్యలు చేశారు. వెయిట్ న్యూస్ కాన్క్లేవ్లో పాల్గొన్న ఆయన, ప్రజల్లో ఉన్న అనేక సందేహాలకు సమాధానాలు ఇచ్చారు.
హైదరాబాద్లో రోజురోజుకూ జనాభా, వాహనాల సంఖ్య పెరుగుతుండటంతో ట్రాఫిక్ సమస్య తీవ్రంగా మారిందని వ్యాఖ్యాత ప్రశ్నించగా, యూటర్న్ల వ్యవస్థ వెనుక ట్రాఫిక్ శాస్త్రం ఉందని డీజీపీ వివరించారు.
“ట్రాఫిక్ డిపార్ట్మెంట్ ఊరికే యూటర్న్లు పెట్టదు. ప్రతి జంక్షన్ను అధ్యయనం చేసి, ట్రాఫిక్ ఫ్లో ఎలా మెరుగుపడుతుందో చూసి నిర్ణయాలు తీసుకుంటారు” అని ఆయన తెలిపారు. ఉదాహరణగా జూబ్లీ చెక్పోస్ట్, కేపీహెచ్బీ వంటి జంక్షన్లను ప్రస్తావిస్తూ, గతంలో మూడు సిగ్నల్స్ మారినా వాహనాలు జంక్షన్ దాటలేకపోయేవని చెప్పారు.
“స్ట్రెయిట్గా వెళ్లి యూటర్న్ తీసుకుని తిరిగి రావడం వల్ల ట్రాఫిక్ వేగంగా క్లియర్ అవుతుంది. కొన్ని చోట్ల ప్రజలకు అసౌకర్యం కలిగే అవకాశం ఉండొచ్చు. అలాంటి వాటిని మేము తిరిగి పరిశీలిస్తాం” అని స్పష్టం చేశారు.
తార్నాక జంక్షన్ ఉదాహరణను ప్రస్తావిస్తూ, గతంలో యూటర్న్ విధానం తీసుకువచ్చిన తర్వాత ప్రజల ఒత్తిడితో మళ్లీ పాత సిగ్నల్ వ్యవస్థను పెట్టాల్సి వచ్చిందని గుర్తు చేశారు. “ట్రాఫిక్ అనేది చాలా టెక్నికల్ సబ్జెక్ట్. ట్రాఫిక్ వాల్యూమ్స్, ఫ్లో, రోడ్ డిజైన్ అన్నీ పరిగణలోకి తీసుకోవాలి” అన్నారు.
రాష్ట్రవ్యాప్తంగా ట్రాఫిక్ సమస్యల పరిష్కారానికి ప్రత్యేక “ట్రాఫిక్ మేనేజ్మెంట్ అండ్ రోడ్ సేఫ్టీ బ్యూరో” ఏర్పాటు చేయబోతున్నట్టు ఆయన వెల్లడించారు. ఈ బ్యూరోలో పోలీస్, ఆర్ అండ్ బీ, ట్రాన్స్పోర్ట్ శాఖల నిపుణులు కలిసి పనిచేస్తారని తెలిపారు.
రోడ్డు ప్రమాదాలపై కూడా ఆయన ఆందోళన వ్యక్తం చేశారు. తెలంగాణలో ప్రతి ఏడాది సుమారు 7,500 మంది రోడ్డు ప్రమాదాల్లో మరణిస్తున్నారని, దేశవ్యాప్తంగా ఈ సంఖ్య 1.75 లక్షలు దాటుతోందని చెప్పారు. ప్రమాదాలను పూర్తిగా ఆపలేకపోయినా, క్రమశిక్షణ, ట్రాఫిక్ నియంత్రణ ద్వారా వాటిని తగ్గించవచ్చన్నారు.
హెల్మెట్, సీట్బెల్ట్ నిబంధనలను కూడా రాష్ట్రవ్యాప్తంగా ఒకే విధంగా అమలు చేయాలని భావిస్తున్నట్టు తెలిపారు. “బ్యాక్ సీట్లో కూర్చున్నవాళ్లు కూడా సీట్బెల్ట్ పెట్టుకోవాలి. చాలా ప్రమాదాల్లో వెనుక కూర్చున్నవాళ్లే ఎక్కువగా చనిపోతున్నారు” అని హెచ్చరించారు.
ప్రస్తుతం తెలంగాణ పోలీస్ శాఖ ఎదుట ఉన్న ప్రధాన సవాళ్లలో డ్రగ్స్, సైబర్ నేరాలు అత్యంత ప్రమాదకరమని డీజీపీ పేర్కొన్నారు. “నార్కోటిక్స్ ఇప్పుడు రాష్ట్రానికి పెద్ద ముప్పుగా మారింది. నగరాలు మాత్రమే కాదు, గ్రామీణ ప్రాంతాలకు కూడా ఇది విస్తరిస్తోంది. దీని మీద యుద్ధ స్థాయిలో పోరాడాల్సిన అవసరం ఉంది” అని అన్నారు.
సైబర్ మోసాలపై కూడా ఆయన ప్రజలను అప్రమత్తం చేశారు. “ఇప్పుడు నేరస్తులు కత్తులతో కాదు, ఫోన్లతో దోపిడీలు చేస్తున్నారు. చాలామంది జీవితాంతం సంపాదించిన డబ్బును నిమిషాల్లో కోల్పోతున్నారు” అని వ్యాఖ్యానించారు.
భవిష్యత్లో ట్రాఫిక్ నియంత్రణ, రోడ్డు భద్రత, డ్రగ్స్ నియంత్రణ, సైబర్ నేరాల అరికట్టడంపై తెలంగాణ పోలీస్ శాఖ మరింత దృష్టి పెట్టబోతుందని డీజీపీ సీవీ ఆనంద్ స్పష్టం చేశారు.
