రాజకీయ వేదికలపై మరోసారి ప్రొఫెసర్ నాగేశ్వరరావు పేరు చర్చనీయాంశంగా మారింది. బీజేపీకి వ్యతిరేకంగా మాట్లాడుతున్నారని ఆరోపిస్తూ ఆయనపై తీవ్ర వ్యాఖ్యలు చేశారు ఓ నేత. “ప్రొఫెసర్ నాగేశ్వరరావు మేధావి కాదు.. కమ్యూనిస్టు భావజాలాన్ని సమర్థించే వ్యక్తి” అంటూ ఘాటు విమర్శలు గుప్పించారు.

“దేశంలో కమ్యూనిజం పూర్తిగా విఫలమైంది. కమ్యూనిస్టు సిద్ధాంతాలు ప్రజల్లో నిలబడలేకపోయాయి. అయినా ఇంకా టీవీల్లో కూర్చొని ఉపన్యాసాలు ఇస్తున్నారు” అంటూ మండిపడ్డారు. “మేధావి అనే పేరు పెట్టుకుంటే సరిపోదు.. సమాజానికి ఉపయోగపడే ఆలోచనలు ఉండాలి” అని వ్యాఖ్యానించారు.

ఇక కమ్యూనిస్టు పార్టీల పరిస్థితిపై కూడా ఆయన తీవ్రంగా స్పందించారు. “ఈ దేశంలో కమ్యూనిస్టులు తమ రాష్ట్రాలనే కాపాడుకోలేకపోయారు. అలాంటివాళ్లు దేశానికి ఏం చెబుతారు?” అని ప్రశ్నించారు. కమ్యూనిజం భావజాలం ప్రజల్లో బలహీనపడిపోయిందని, ప్రస్తుతం ఆ సిద్ధాంతం ప్రభావం తగ్గిపోయిందని అన్నారు.

అలాగే తాను వివిధ రాజకీయ నాయకులు, భావజాలాలకు చెందిన వ్యక్తులను కలవడాన్ని తప్పుగా చూడొద్దని చెప్పారు. “మేము అందరి ఇళ్లకీ వెళ్తాం. మాట్లాడతాం. టీ తాగుతాం. అందులో తప్పేముంది?” అని వ్యాఖ్యానించారు. “దేశ ప్రయోజనాల కోసం అవసరమైతే ఎవరితోనైనా రాజకీయంగా మాట్లాడతాం” అని తెలిపారు.

ఈ సందర్భంగా జమ్మూ కాశ్మీర్‌లో PDPతో బీజేపీ పొత్తుపై వచ్చిన విమర్శలకు కూడా సమాధానం ఇచ్చారు. “దేశ ప్రయోజనం కోసం అవసరమైతే ప్రాంతీయ పార్టీలతో కూడా కలిసి పనిచేస్తాం” అని పేర్కొన్నారు. రాజకీయాల్లో వ్యూహాలు పరిస్థితులకు అనుగుణంగా ఉంటాయని అన్నారు.

ప్రొఫెసర్ నాగేశ్వరరావు చేసిన వ్యాఖ్యలకు స్పందనగానే ఈ కామెంట్లు చేసినట్లు రాజకీయ వర్గాల్లో చర్చ జరుగుతోంది. ప్రస్తుతం ఈ వ్యాఖ్యలు సోషల్ మీడియాలో వైరల్‌గా మారాయి.