తెలంగాణలో బీజేపీ పరిస్థితి రోజురోజుకీ దయనీయంగా మారుతోంది. ఒకప్పుడు కాంగ్రెస్, బీఆర్ఎస్కు ప్రత్యామ్నాయంగా ఎదగాల్సిన పార్టీ, ఇప్పుడు అంతర్గత నిర్లక్ష్యం, నాయకత్వ వైఫల్యంతో తన స్థానం తానే కోల్పోతున్నట్టుగా కనిపిస్తోంది.
ఇటీవలి పరిణామాల్లో మాజీ ఎమ్మెల్యే ఆరూరి రమేష్ మళ్లీ బీఆర్ఎస్ గూటికి చేరబోతున్నారన్న వార్తలు రాజకీయ వర్గాల్లో చర్చనీయాంశంగా మారాయి. గతంలో బీఆర్ఎస్ తరపున ఎమ్మెల్యేగా గెలిచిన ఆయన, బీజేపీలో చేరిన తర్వాత ఆశించిన స్థాయిలో గుర్తింపు, పదవులు రాకపోవడంతో తిరిగి సొంత గూటికే వెళ్లాలని నిర్ణయించుకున్నట్టు తెలుస్తోంది. ఇది వ్యక్తిగత నిర్ణయం మాత్రమే కాదు, బీజేపీలోని వ్యవస్థాత్మక లోపాలకు నిదర్శనం.
పార్టీ కోసం నిరంతరం పనిచేసే గ్రౌండ్ లెవల్ నాయకులను బీజేపీ పూర్తిగా విస్మరిస్తోందన్న విమర్శలు బలంగా వినిపిస్తున్నాయి. చీకోటి ప్రవీణ్, మాధవిలత వంటి నాయకులు ఏ సమస్య వచ్చినా బీజేపీ తరపున ముందుండి పోరాడతారు. అయినా వారికి కీలక పదవులు గానీ, ఎన్నికల సమయంలో నిర్ణయాధికారం గానీ ఇవ్వకపోవడం పార్టీ దౌర్భాగ్యానికి కారణమవుతోంది.
టికెట్ల ఎంపికలోనూ అదే పరిస్థితి. గెలిచే అవకాశం ఉన్నవారిని పక్కన పెట్టి, గతంలో ఓడిపోయిన లేదా ప్రజల్లో ఆదరణ లేని అభ్యర్థులకే మళ్లీ మళ్లీ అవకాశాలు ఇవ్వడం వల్ల పార్టీ ఫలితాలు మరింత దిగజారుతున్నాయి. గెలుపు సంగతి పక్కన పెడితే, కనీసం రెండో స్థానంలో నిలిచే పరిస్థితి కూడా కనిపించడం లేదు.
ఇక తెలంగాణపై బీజేపీ కేంద్ర నాయకత్వ దృష్టి ఏమిటన్న ప్రశ్న ప్రజల్లో బలంగా ఉంది. ఎన్నికలు వచ్చినా, ప్రచారాలు చేయాలన్న ఉత్సాహం పార్టీ శ్రేణుల్లో కనిపించడం లేదు. కొద్దిమంది నేతలు మాత్రమే మీడియా ముందుకు వచ్చి మాట్లాడుతుండగా, మిగతా వ్యవస్థ మొత్తం మౌనంగా ఉంది.
ఈ పరిస్థితుల్లో బీజేపీపై ప్రజల్లో నమ్మకం ఎందుకు తగ్గుతోందో అర్థం చేసుకోవడం పెద్ద విషయం కాదు. కాంగ్రెస్ను గద్దదించాలి, బీఆర్ఎస్కు ప్రత్యామ్నాయం కావాలి అనే మాటలు వినిపిస్తున్నా, ఆచరణలో మాత్రం బీజేపీ కూడా అదే పాత రాజకీయాలకు ప్రతిరూపంగా మారుతున్నట్టు భావన ఏర్పడుతోంది.
ఇలా కొనసాగితే, తెలంగాణ రాజకీయాల్లో బీజేపీ స్థానం మరింత దిగజారి, భవిష్యత్తులో మూడో స్థానంలో కూడా నిలవలేని పరిస్థితి రావడం ఆశ్చర్యం కాదు. ఇప్పటికైనా పార్టీ తన లోపాలను సరిదిద్దుకుని, నిజాయితీగా పనిచేసే నాయకులకు విలువ ఇవ్వకపోతే, తెలంగాణలో బీజేపీ పతనం అనివార్యం.
