ఆన్లైన్ బెట్టింగ్ యాప్స్పై సీఐడీ ప్రత్యేక ఆపరేషన్ చేపట్టి దేశవ్యాప్తంగా భారీ చర్యలు ప్రారంభించింది. ఢిల్లీ, గుజరాత్, పంజాబ్ రాష్ట్రాల్లో మ్యూల్ అకౌంట్ల ఆపరేటర్లను లక్ష్యంగా చేసుకుని రెండు వారాల పాటు నిర్వహించిన సెర్చ్ ఆపరేషన్లో కీలక పురోగతి సాధించింది.
సీఐడీ వెల్లడించిన వివరాల ప్రకారం, డఫాబెట్ వంటి బెట్టింగ్ యాప్స్కు సంబంధించి దేశవ్యాప్తంగా 225 ఫిర్యాదులు అందగా, ఇప్పటికే 73 క్రిమినల్ కేసులు నమోదయ్యాయి. ఈ కేసుల దర్యాప్తులో భాగంగా ఆఫ్ఘనిస్తాన్కు చెందిన సైబర్ నేరగాడితో పాటు మొత్తం 11 మందిని అరెస్ట్ చేశారు.
అరెస్టయిన వారి వద్ద నుంచి BMW, Mercedes, Kia Seltos కార్లు, ల్యాప్టాప్లు, 26 మొబైల్ ఫోన్లు, ఐదు పాస్పోర్టులు, రూ.3.21 లక్షల నగదు స్వాధీనం చేసుకున్నారు. విచారణలో ఫిలిప్పీన్స్లో యాప్ను అభివృద్ధి చేసి, యూకే నుంచి ఆపరేషన్లు నిర్వహిస్తున్నట్లు అధికారులు గుర్తించారు.
దర్యాప్తులో మరో కీలక విషయం వెలుగులోకి వచ్చింది. ఈ యాప్స్ ద్వారా నిర్వహకులు కమిషన్ రూపంలో రోజుకు రూ.8 లక్షల నుంచి రూ.10 లక్షల వరకు ఆదాయం పొందుతున్నట్లు సమాచారం. బెట్టింగ్ లావాదేవీలపై 1.5 శాతం నుంచి 5 శాతం వరకు కమిషన్ వసూలు చేస్తున్నట్లు అధికారులు అనుమానిస్తున్నారు.
ఇప్పటివరకు రాష్ట్రంలో 108 బెట్టింగ్ యాప్స్ను బ్లాక్ చేయగా, 37 జియో ఫెన్సింగ్ చర్యలు అమలు చేశారు. అలాగే బెట్టింగ్ యాప్స్ ప్రమోషన్కు సంబంధించి 25 మంది సెలబ్రిటీలు, సోషల్ మీడియా ఇన్ఫ్లుయెన్సర్లకు సీఐడీ కౌన్సిలింగ్ నిర్వహించింది.
ఆన్లైన్ బెట్టింగ్ యాప్స్ యువతను ఆకర్షించేందుకు సెలబ్రిటీలు, ఇన్ఫ్లుయెన్సర్లను ఉపయోగిస్తున్నాయనే ఆరోపణలు పెరుగుతున్నాయి. ఖరీదైన కార్లు, విలాసవంతమైన జీవనశైలి, భారీ లాభాల హామీలతో ప్రజలను ఆకర్షించి బెట్టింగ్ వైపు మళ్లిస్తున్నారని విమర్శలు వ్యక్తమవుతున్నాయి.
నిపుణుల అభిప్రాయం ప్రకారం, బెట్టింగ్ యాప్స్ మొదట్లో చిన్న మొత్తాల్లో లాభాలు చూపించి వినియోగదారుల నమ్మకం పొందుతాయి. ఆ తర్వాత పెద్ద మొత్తాల్లో పెట్టుబడులు పెట్టించేలా ప్రలోభపెట్టి చివరకు భారీ నష్టాలకు గురిచేస్తాయి. దీంతో చాలా మంది అప్పుల ఊబిలో కూరుకుపోవడమే కాకుండా, మానసిక ఒత్తిడికి గురై తీవ్ర నిర్ణయాలు తీసుకునే పరిస్థితులు కూడా ఏర్పడుతున్నాయి.
సీఐడీ అధికారులు ప్రజలకు హెచ్చరిక జారీ చేస్తూ, ఆన్లైన్ బెట్టింగ్ యాప్స్కు దూరంగా ఉండాలని, ఇలాంటి అక్రమ కార్యకలాపాలను ప్రోత్సహించే ప్రకటనలు లేదా లింకులు కనిపిస్తే వెంటనే సంబంధిత అధికారులకు సమాచారం అందించాలని సూచించారు.
