తెలంగాణ రెవెన్యూ శాఖలో డిప్యూటీ కలెక్టర్గా పనిచేస్తున్న రాము నాయక్పై ప్రభుత్వం కఠిన చర్యలు తీసుకుంది. గతంలో హౌసింగ్ బోర్డులో డిప్యూటేషన్పై భూసేకరణ అధికారిగా పనిచేసిన సమయంలో భూదందాలు, అక్రమ రిజిస్ట్రేషన్లకు పాల్పడినట్లు ప్రాథమిక విచారణలో తేలడంతో ఆయనను సస్పెండ్ చేస్తున్నట్లు మంత్రి Ponguleti Srinivasa Reddy ప్రకటించారు.
రాము నాయక్కు సహకరించిన సూపరింటెండెంట్ వివేకానందను విధుల నుంచి శాశ్వతంగా తొలగించగా, మరో సూపరింటెండెంట్ బోనా నాయక్ను సస్పెండ్ చేసినట్లు మంత్రి వెల్లడించారు. హైదరాబాద్ పరిసర ప్రాంతాల్లో ఇందిరమ్మ ఇళ్ల నిర్మాణానికి హౌసింగ్ బోర్డు భూములను పరిశీలించే క్రమంలో ఈ అక్రమాలు వెలుగులోకి వచ్చినట్లు తెలిపారు.
హైకోర్టు సమీపంలో హౌసింగ్ బోర్డుకు చెందిన అత్యంత విలువైన భూమిని 2018లో అక్రమంగా రిజిస్ట్రేషన్ చేయించినట్లు గుర్తించినట్లు మంత్రి పేర్కొన్నారు. ఈ భూమిని హౌసింగ్ బోర్డులో పనిచేసిన మాజీ ఉద్యోగికి సంబంధించిన కుటుంబ సభ్యుల పేరిట రిజిస్ట్రేషన్ చేసినట్లు ఆరోపణలు ఉన్నాయి. ఆ భూమికి సంబంధించిన చెల్లింపులు కూడా బోర్డుకు జమ కాలేదని వెల్లడించారు.
ఈ వ్యవహారంలో అప్పటి సబ్-రిజిస్ట్రార్ పాత్రపై కూడా విచారణకు ఆదేశాలు జారీ చేసినట్లు తెలిపారు. అనంతరం అదే భూమిని మరో వ్యక్తికి విక్రయించడంతో మొత్తం వ్యవహారంపై సమగ్ర దర్యాప్తు కొనసాగుతోందన్నారు.
అలాగే విజయసాగర్ కాలనీ, తుల్జాగూడ, లక్ష్మిగూడ, మహబూబ్గంజ్ ప్రాంతాల్లోనూ పలువురు వ్యక్తుల పేర్లపై అక్రమ రిజిస్ట్రేషన్లు జరిగినట్లు ఆరోపణలు ఉన్నాయని, వాటిపై విచారణ కొనసాగుతోందని మంత్రి వెల్లడించారు. ఈ కేసుల్లో సంబంధిత అధికారుల పాత్రను కూడా పరిశీలించాలని స్టాంప్స్ అండ్ రిజిస్ట్రేషన్స్ శాఖ అధికారులను ఆదేశించినట్లు తెలిపారు.
విచారణ పూర్తయ్యాక ఆరోపణలు పూర్తిగా రుజువైతే రాము నాయక్ను ప్రభుత్వ ఉద్యోగం నుంచి శాశ్వతంగా తొలగించే చర్యలు తీసుకుంటామని మంత్రి స్పష్టం చేశారు.
రెవెన్యూ శాఖలో అక్రమ రిజిస్ట్రేషన్లు, భూదందాలపై ప్రభుత్వం ప్రత్యేక దృష్టి సారించిందని, ఎవరైనా అధికార దుర్వినియోగానికి పాల్పడితే కఠిన చర్యలు తప్పవని ప్రభుత్వం హెచ్చరించింది. భూముల రికార్డులు, రిజిస్ట్రేషన్ల వ్యవహారాల్లో పారదర్శకత తీసుకురావడమే లక్ష్యంగా ముందుకు సాగుతున్నట్లు అధికారులు పేర్కొంటున్నారు.
