తెలంగాణ రాజకీయాల్లో సంచలనం రేపుతున్న బండి సంజయ్ కుమారుడికి సంబంధించిన కేసుపై సీఎం రేవంత్ రెడ్డి చేసిన వ్యాఖ్యలు తీవ్ర చర్చకు దారితీశాయి. “నీ కొడుకుని తీసుకొచ్చి పోలీసులకు అప్పగించు.. విచారణను ధైర్యంగా ఎదుర్కో” అంటూ సీఎం చేసిన వ్యాఖ్యలు ఇప్పుడు రాజకీయ వర్గాల్లో హాట్ టాపిక్గా మారాయి.
ఈ కేసులో తన పేరు ప్రస్తావించొద్దని, తన కుటుంబాన్ని టార్గెట్ చేస్తున్నారని కేంద్ర మంత్రి Bandi Sanjay Kumar అభ్యంతరం వ్యక్తం చేసిన నేపథ్యంలో సీఎం స్పందించారు. అయితే ప్రతిపక్షాలు మాత్రం “అయితే ఎవరి కొడుకు?” అంటూ ప్రశ్నలు లేవనెత్తుతున్నాయి.
కేసు ప్రారంభమైనప్పటి నుంచి బాధితురాలు మైనరా? మేజరా? అనే అంశంపై పెద్ద ఎత్తున చర్చ జరిగింది. తాజాగా పోలీసులు బాధితురాలు మైనర్ అని బర్త్ సర్టిఫికెట్ ఆధారంగా నిర్ధారించినట్లు సమాచారం రావడంతో కేసు మరో మలుపు తిరిగింది. ఈ నేపథ్యంలో సీఎం రేవంత్ రెడ్డి మాట్లాడుతూ, “ఒక అబ్బాయి, ఒక అమ్మాయి భవిష్యత్తుకు సంబంధించిన అంశం కావడంతో తొందరపడి నిర్ణయం తీసుకోలేం. అన్ని ఆధారాలు పరిశీలించి చట్టపరంగా చర్యలు తీసుకుంటాం” అని తెలిపారు.
కొడుకు చేసిన తప్పుకు తండ్రిని అరెస్ట్ చేయలేం. కానీ విచారణ నుంచి తప్పించుకోవద్దు. ధైర్యంగా ఎదుర్కొంటే నిజం బయటపడుతుంది” అని సీఎం వ్యాఖ్యానించారు. బాధితురాలికి 100 శాతం న్యాయం చేస్తామని కూడా ఆయన హామీ ఇచ్చారు.
అదే సమయంలో సీఎం రేవంత్ రెడ్డి జాతీయ రాజకీయాలపై కూడా కీలక వ్యాఖ్యలు చేశారు. రాబోయే ఎన్నికల్లో Rahul Gandhiనే ప్రధానమంత్రి అభ్యర్థి అని పేర్కొంటూ, 2034 వరకు తానే తెలంగాణ ముఖ్యమంత్రిగా కొనసాగుతానని వ్యాఖ్యానించారు. అనంతరం జాతీయ రాజకీయాల్లోకి వెళ్లి పార్టీ అప్పగించే బాధ్యతలు నిర్వర్తిస్తానని చెప్పారు.
ఇక “ఫ్యూచర్ సిటీ” ప్రాజెక్టుపై కూడా సీఎం చేసిన వ్యాఖ్యలు చర్చనీయాంశమయ్యాయి. భారీ పెట్టుబడులు, కనెక్టివిటీ, అభివృద్ధి పేరుతో ప్రభుత్వం ముందుకు వెళ్తున్నప్పటికీ, రైతుల భూములు కోల్పోయే ప్రమాదం ఉందని విమర్శలు వస్తున్నాయి. ముఖ్యంగా ఔటర్ రింగ్ రోడ్ అవతల ఉన్న గ్రామాలు, వ్యవసాయ భూములు ప్రభావితమయ్యే అవకాశం ఉందని స్థానికులు ఆందోళన వ్యక్తం చేస్తున్నారు.
ప్రస్తుతం ఈ మొత్తం వ్యవహారం తెలంగాణ రాజకీయాల్లో తీవ్ర దుమారం రేపుతోంది.
