తెలంగాణ రాష్ట్రంలో కొత్త రాజకీయ శక్తిగా “తెలంగాణ రక్షణ సేన” పేరుతో ప్రజల ముందుకు వస్తున్నామని మాజీ ఎమ్మెల్సీ K. Kavitha ప్రకటించారు. తెలంగాణ జాగృతి సంస్థను కొనసాగిస్తూ, తెలంగాణ రక్షణ సేనను రాజకీయ వేదికగా తీసుకొస్తున్నామని తెలిపారు. ప్రజల సమస్యలను ప్రశ్నించే గొంతుకగా, పాలక-ప్రతిపక్ష పార్టీల వైఫల్యాలను ఎత్తిచూపే శక్తిగా ఈ పార్టీ పనిచేస్తుందని చెప్పారు.
సర్వోదయ తెలంగాణే తమ ప్రధాన లక్ష్యమని కవిత వెల్లడించారు. ప్రతి కుటుంబంలో వెలుగులు నింపే విధంగా పరిపాలన ఉండాలని, అందరికీ సమాన అవకాశాలు కల్పించడమే పార్టీ ఉద్దేశమన్నారు. “పాంచజన్యం” పేరుతో ఐదు ప్రధాన అంశాలను పార్టీ ప్రాధాన్యతలుగా నిర్ణయించామని పేర్కొన్నారు.
విద్యను పూర్తిగా ఉచితంగా అందించడమే తమ మొదటి సంకల్పమని తెలిపారు. ప్రభుత్వ పాఠశాలలతో పాటు ప్రైవేట్ స్కూల్లు, కాలేజీలు, ప్రొఫెషనల్ కోర్సుల్లో చదివే విద్యార్థులకు కూడా ప్రభుత్వం పూర్తి ఫీజులు భరిస్తుందని హామీ ఇచ్చారు. “పిల్లలు డాక్టర్ అయినా, ఇంజనీర్ అయినా, రాకెట్ సైంటిస్ట్ అయినా తల్లిదండ్రుల జేబు నుంచి ఒక్క రూపాయి ఖర్చు కాకుండా చదివిస్తాం” అని అన్నారు.
రెండవ ప్రధాన అంశంగా వైద్యాన్ని ప్రకటించిన కవిత, కార్పొరేట్ ఆసుపత్రుల్లోనూ పూర్తిగా ఉచిత వైద్యం అందించే విధానం తీసుకొస్తామని చెప్పారు. ఆరోగ్యశ్రీ పరిమితులను అధిగమించి, ఎంత పెద్ద వ్యాధి అయినా ప్రజల ప్రాణాలను కాపాడేందుకు ప్రభుత్వం బాధ్యత తీసుకుంటుందని తెలిపారు.
వ్యవసాయం మూడవ ప్రాధాన్యత అంశమని పేర్కొంటూ రైతులకు గౌరవం, సమయానికి కొనుగోలు కేంద్రాలు, ఎరువుల సరఫరా, ధాన్యం ఎగుమతులపై ప్రత్యేక విధానం తీసుకొస్తామని వెల్లడించారు. రైతుల ఆత్మగౌరవాన్ని కాపాడే ప్రభుత్వంగా నిలుస్తామని హామీ ఇచ్చారు.
నాలుగవ అంశంగా ఉపాధిపై దృష్టి పెట్టామని చెబుతూ, యువతకు రూ.1 లక్ష నుంచి రూ.20 కోట్ల వరకు బ్యాంకుల ప్రమేయం లేకుండా రుణాలు ఇస్తామని ప్రకటించారు. 18 నుంచి 45 ఏళ్ల మధ్య యువత తమ ఆలోచనలను వ్యాపారాలుగా మార్చుకునేందుకు ప్రభుత్వం పెట్టుబడులు పెడుతుందని చెప్పారు. అదే సమయంలో లక్షలాది ప్రభుత్వ ఉద్యోగాలను భర్తీ చేస్తామని తెలిపారు.
సీనియర్ సిటిజన్ల కోసం ప్రత్యేక శాఖ ఏర్పాటు చేస్తామని, వారి అనుభవాన్ని సమాజానికి ఉపయోగపడేలా చేసే విధానాలు తీసుకొస్తామని కవిత వెల్లడించారు. వృద్ధులకు గౌరవం, భద్రత, ఆరోగ్య రక్షణ కల్పించే ప్రత్యేక విధానం అవసరమని అభిప్రాయపడ్డారు.
ప్రజల జీవితాలను మార్చే సంకల్పంతోనే తెలంగాణ రక్షణ సేనను ప్రారంభించామని, మాట ఇచ్చిన ప్రతి హామీని అమలు చేస్తామని కవిత స్పష్టం చేశారు.
