దుల్లపల్లిలో నకిలీ ఓఆర్సీ మాయాజాలం.. భూ అక్రమ దందాపై సంచలన ఆరోపణలు

మేడ్చల్-మల్కాజిగిరి జిల్లాలోని దుల్లపల్లి గ్రామంలో మరో భూ అక్రమ దందా వెలుగులోకి రావడం సంచలనంగా మారింది. ఇప్పటికే సర్వే నెంబర్ 154లో జరిగిన భూ వివాదాలపై ఫిర్యాదులు నమోదవుతుండగా, తాజాగా సర్వే నెంబర్ 155లో కూడా భారీ స్థాయిలో అక్రమాలు జరిగినట్లు ఆరోపణలు వెల్లువెత్తుతున్నాయి. బాధితులు కలెక్టర్ కార్యాలయంలో ఫిర్యాదు చేస్తూ నకిలీ పత్రాల ఆధారంగా భూములను విక్రయించారని, అసలు యజమానులను ఇబ్బందులకు గురిచేస్తున్నారని పేర్కొన్నారు.

ఫిర్యాదు ప్రకారం, దుల్లపల్లి గ్రామంలోని సర్వే నెంబర్ 155లోని రెండు ఎకరాల భూమిని 1975లో ప్రభుత్వం టెనెన్సీ చట్టం కింద దుర్గం నారాయణ, దుర్గం రాములకు కేటాయించింది. అనంతరం వారసుల నుంచి శంకర్ రెడ్డి భాగస్వామ్యంగా భూమిని కొనుగోలు చేయగా, తర్వాత పూర్తి హక్కులు ఆయనకే వచ్చాయి. 2013లో అప్పటి తహసీల్దార్ పట్టాదారు పాస్‌బుక్, టైటిల్ డీడ్ కూడా జారీ చేశారు.

అయితే ఈ భూమిపై కన్నేసిన కొందరు వ్యక్తులు నకిలీ పత్రాలు సృష్టించి, సర్వే నెంబర్ 154కు సంబంధించిన పాత జీపీఏను ఆధారంగా చూపిస్తూ సర్వే నెంబర్ 155పై ఓఆర్సీ పొందినట్లు ఆరోపణలు ఉన్నాయి. అదే పత్రాలతో ఒక వెల్ఫేర్ సొసైటీకి భూమిని విక్రయించగా, మోసం బయటపడటంతో ఆ రిజిస్ట్రేషన్ రద్దయింది. అయినప్పటికీ అదే రద్దయిన పత్రాలను ఆధారంగా చేసుకుని మరికొందరికి భూమిని విక్రయించారని ఫిర్యాదుదారులు చెబుతున్నారు.

ఈ వ్యవహారంపై రెవెన్యూ అధికారులు గతంలో విచారణ జరిపి సంబంధిత ఓఆర్సీ నకిలీదేనని నిర్ధారించినట్లు తెలుస్తోంది. 2008లో అప్పటి రంగారెడ్డి జిల్లా జాయింట్ కలెక్టర్ ఆ ఓఆర్సీని రద్దు చేస్తూ ఉత్తర్వులు జారీ చేశారు. అనంతరం సివిల్ కోర్టు, హైకోర్టు స్థాయిల్లో కూడా శంకర్ రెడ్డికి అనుకూలంగా తీర్పులు వచ్చినప్పటికీ, వివాదాస్పద రిజిస్ట్రేషన్లు కొనసాగినట్లు ఆరోపణలు ఉన్నాయి.

బాధితులు చెబుతున్నదేమిటంటే, కోర్టు స్టేటస్ కో ఆదేశాలు అమల్లో ఉన్నప్పటికీ కొందరు వ్యక్తులు 2019లో కొత్త రిజిస్ట్రేషన్ డాక్యుమెంట్లు సృష్టించి భూమిని మరికొందరికి బదిలీ చేశారని. ఈ నేపథ్యంలో రద్దయిన ఓఆర్సీ ఆధారంగా జరిగిన అన్ని రిజిస్ట్రేషన్లను రద్దు చేసి సమగ్ర విచారణ జరపాలని కలెక్టర్‌ను కోరారు.

ఇదే సమయంలో హైదరాబాద్ పరిసర ప్రాంతాల్లో భూ కబ్జాలు, నకిలీ పత్రాలు, డబుల్ రిజిస్ట్రేషన్లు, ప్రభుత్వ మరియు ఎస్సీ భూముల ఆక్రమణలపై కూడా తీవ్ర ఆరోపణలు వినిపిస్తున్నాయి. భూ మాఫియాలు రెవెన్యూ వ్యవస్థలోని లోపాలను ఆసరాగా చేసుకుని కోట్ల రూపాయల విలువైన భూములను అక్రమంగా స్వాధీనం చేసుకుంటున్నాయనే విమర్శలు వ్యక్తమవుతున్నాయి.

దుల్లపల్లి భూ వివాదం ఇప్పుడు మళ్లీ చర్చనీయాంశంగా మారగా, బాధితులు న్యాయం కోసం అధికారులను ఆశ్రయిస్తున్నారు. ఈ వ్యవహారంపై ప్రభుత్వం, రెవెన్యూ శాఖ ఎలాంటి చర్యలు తీసుకుంటాయన్నది ఆసక్తికరంగా మారింది.